Iri ku kɔ̃ 62 - Bibeli do fee

Kɔkɔi Aɔ̃ Lafɛ̃ɛi an yɔkɔ n wɛɛ do laakai ku sũ

¹ Iriu ihɛ̃ ti inɛ ngboi woo kɔ̃ iri ŋai do Yedutunu do Davidi.

² Ntɔ ntɔ, bi Ilaaɔ̃i hundem í ya ba laakai ku sũ. Hai bi titɛɛi faabam wa naa.

³ Ntɔ ntɔ, nŋui í jɛ kuta ku nɛ gbugbãm do faabam. Nŋui í jɛ gbugbãm, n kaa n koosɛ pai.

⁴ Hee waati yoomai aa kɔ̀ i tɔtɔɔ i maa cã inɛ gɔ i ba i kpaa ŋa, bɛi bindi iyi à tale í wɔɔba do bɛi danga iyi wa cuku.

⁵ Ntɔ ntɔ, à busi njɛ a ba a kɛkɛɛ hai si kitãɛ. Si iboi à ya nɛ si inɔ didɔ̃. À ya maa weei do gɛlɛ nŋa nɔ à maa ceekpe si inɔ nŋa. Kusĩmi.

⁶ Ntɔ ntɔ, bi Ilaaɔ̃ nŋu akãi an dɛdɛ laakai ku sũ domi bi titɛɛi kpãa ku cɔm í wa.

⁷ Ntɔ ntɔ, nŋui í jɛ kuta ku nɛ gbugbãm do faabam. Nŋui í jɛ gbugbãm, n kaa n koosɛ pai.

⁸ Si Ilaaɔ̃i faabam do bɛɛrɛm í wa, nŋui í jɛ kuta ku nɛ gbugbãm. Ilaaɔ̃i í jɛ bi ku manjim.

⁹ Iŋɛ inɛɛ ŋa, i dasiɛ naanɛ ŋa waati kãma fei, nɔ i sɔ̃ɔ mii iyi í wa nŋɛ si idɔ. Ilaaɔ̃i í jɛ bi ku manji nwa. Kusĩmi.

¹⁰ Ntɔ ntɔ, amai amanɛ ŋa à yɛi bɛi fufu. Amanɛ ŋa ilu ibo ŋai. Si kiloo akãi aŋa fei à ya gũ ajɔ, nɔ à ya fɛlɛi bɛi fufu.

¹¹ I maà jɔ̀ naanɛ nŋɛ ku wa si gbugbã ku taa inɛ ŋa. I maà jɔ̀ lasabu nŋɛ ku wa si ile ŋa. Baa bii amani nŋɛ í la wa kɔ̃ɔsi i maà jɔ̀ lasabu nŋɛ fei ku wa si bɛ.

¹² Kù jɛ gbakã akãi ǹ gbɔ iyi Aɔ̃ Lafɛ̃ɛ í fɔ í ni gbugbã fei wa naai hai bi ti nŋu.

¹³ Aɔ̃ Lafɛ̃ɛ, awɔi ì jɛ dee dee, domi awɔi ì ya sãa inɛ baa yooma fei bɛi kuceɛ í to.