Iri ku kɔ̃ 6 - Bibeli do fee

Aɔ̃ Lafɛ̃ɛ, maà yɛ taalem

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do mɔɔlɔ ilu ikũ mɛɛjɔ.

² Aɔ̃ Lafɛ̃ɛ, maà yɛ taalem si idɔɔkɔ̃ɛ, nɔ i maà kpãm iju si waatii idɔɔkɔ̃ɛu.

³ Aɔ̃ Lafɛ̃ɛ, ceem didɔ̃ domi ǹ kua gbugbã. Aɔ̃ Lafɛ̃ɛ, jɔ̀ n ba iri domi kũkũm ŋa fei à waa yaya.

⁴ Aɔ̃ Lafɛ̃ɛ, ǹ wɛɛò zigiida. Hee waati yoomai aa maa mum do taale.

⁵ Aɔ̃ Lafɛ̃ɛ, nyi wa, nɔ i ya hundem, faabam na jiida ku jɛɛ,

⁶ domi bii inɛ í ku, kaa ye gigiɛ má. Inɛ ŋa iyi à si a kaa yɔkɔ a cĩɛ má.

⁷ Ǹ ya n gbɛɛji na weewea ku ce. Idũ fei cikãajui ǹ ya n cɔ̀ò bi ku sũm. Inyii ijum í ya cɔ daayim nii.

⁸ Ijum ŋa à gbɛɛji na inɔ kufɔ. Ijum ŋau à gbɛɛjii na kukpɔi mbɛɛm ŋau.

⁹ Iŋɛ iyi ì waa ce laalɔ fei, i fa ara nŋɛ hai bi tom, domi Aɔ̃ Lafɛ̃ɛ í gbɔ kukpatam.

¹⁰ Aɔ̃ Lafɛ̃ɛ í gbɔ idem ŋa, Aɔ̃ Lafɛ̃ɛ í gba kutɔɔm.

¹¹ Mbɛɛm ŋa fei anyɔ á mu ŋai, nɔ aa maa yayai do njo. Aa nyi do anyii anu akã nɔ anyɔ ku bii ŋa.