Iri ku kɔ̃ 59 - Bibeli do fee

Ilaaɔ̃ Lafɛ̃ɛm, nyam hai si awɔi mbɛɛm ŋa

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu iyi wa ni, maà jɔ̀ ku ce nfe. Iriu wa fɔ idei waati iyi Saulu í bɛ inɛ ŋa kpasɛ̃i Davidi a koo a maa kɛɛmaɛ ku ba a kpaa.

² Ilaaɔ̃ Lafɛ̃ɛm, nyam hai si awɔi mbɛɛm ŋa. Faabam si gãmɛi inɛ ŋa iyi à dede sim wa.

³ Nyam hai si awɔi woo ce laalɔ ŋa, faabam hai si awɔi woo kpa inɛ ŋau.

⁴ Aɔ̃ Lafɛ̃ɛ, inɛ ŋau wee à waa manjiim. Ilu gbugbã ŋai nɔ à ce anu akã sim, baa do iyi n kù ce laalɔ kãma, nɔ n kù ce dulum kãma.

⁵ Do iyi n kù ce laalɔ gɔ fei, à sɛi, à waa ce sɔɔlu. Aɔ̃ Lafɛ̃ɛ, cɔ, dede i naa i kòm.

⁶ Awɔ Aɔ̃ Lafɛ̃ɛi lele do ilɛ, Lafɛ̃ɛi inɛi Izirɛli ŋa, dede si dimi ŋau fei i kpã ŋa iju. Maà ce araarei baa inɛ akãi woo ce laalɔ ŋau. Kusĩmi.

⁷ Alɛ, à ya baai a maa dɔ̃ anu bɛi aja ŋa, nɔ a maa kaako iluu.

⁸ Gɛlɛ nŋa wa kɔ̃i do laalɔ. Ide nŋa í yɛi bɛi taakuba. Nɔ à ya maa ni yooi á gbɔ idei aŋa.

⁹ Amma Aɔ̃ Lafɛ̃ɛ, awɔ ì waa nyaanyi ŋai nɔ ì waa yaako dimi ŋau aŋa fei.

¹⁰ Awɔ woo degbem, do ikpa bi tɛɛi ǹ wa n cɔ. Awɔ Aɔ̃ Lafɛ̃ɛ, awɔi ì jɛ bi ku manji ilu gbugbãm.

¹¹ Aɔ̃ Lafɛ̃ɛm, awɔ iyi ì jɛ inɛ jiida, naa cuam, awɔi aa jɔ̀ n yɛ bɛi aa jɛ mbɛɛm ŋa igũ.

¹² Maà kpa ŋa ku ba dimim ŋa a maà gbɛjɛ mii iyi ì ce. Jɔ̀ do gbugbãɛ a maa dabii nɔ a koo a cuku, domi awɔi ì jɛ bɛi tɛli nwa.

¹³ Idei gɛlɛ nŋa fei ide laalɔi. Jɔ̀ faau nŋa ku kɛkɛ ŋa, domi idei ibo do idei zambai à ya maa fɔ.

¹⁴ Ilaaɔ̃, ce nfe nŋa do idɔɔkɔ̃, na mba a maà wɛɛ má. Nɔ a mà iyi awɔi ì jɛ inɛ ngbo si dimii Zakɔbu hee do si andunyau fei. Kusĩmi.

¹⁵ Alɛ, à ya baai a maa dɔ̃ anu bɛi aja ŋa, nɔ a maa kaako iluu.

¹⁶ À ya maa dabii bii fei a maa dɛdɛ sɔnda iyi aa jɛ. Nɔ bii à koo à ba à jɛ nɔ a kù yo à ya maa gbongbooi.

¹⁷ Amu, an kɔ̃ irii na gbugbãɛ. Hai daadaakɔ an maa n cĩɛi na jiida ku jɛɛ domi awɔi ì jɛ bi ku manji ilu gbugbãm, do bi ku manjim si inɔ kufɔm.

¹⁸ Ilaaɔ̃, awɔi ì jɛ gbugbãm. An maa n cĩɛi ajɔ fei. Awɔi ì jɛ bi ku manji ilu gbugbãm, nɔ awɔi ì ceem jiida.