Iri ku kɔ̃ 58 - Bibeli do fee

Ilaaɔ̃ í wɛɛ iyi wa kiiti si ilɛ

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu iyi wa ni, maà jɔ̀ ku ce nfe.

² Ntɔ ntɔ waati iyi ì waa ce kiiti ŋa ì ya singa ngɔgɔ ŋai? Ì ya jɛ dee dee waati iyi ì waa kiiti amanɛ ŋa?

³ Aawo, bɛi idɔ nŋɛ í bii ì waa ce ŋa nɔ iyi bɛ kurarai. Si ilɛu inɔ kukãi ì waa muaa gbugbã ŋa.

⁴ Ilu inɔ kukã ŋa, inɛ laalɔ ŋai hai inɔi iye nŋa wa gbakã. Ilu ibo ŋa mɔ hai à waa fita wa hai inɔi iye nŋa ŋa gbakã à ya nyɔi.

⁵ Gɛlɛ nŋa í ya nɛ acĩi bɛi njo wukuku, nɔ à ya dĩ itĩ nŋai bɛi njo dekĩ

⁶ iyi ci ya gbɔ idei woo mà dobu dobu ku ce ŋa, nɔ ci ya gbɔ baa ti inɛ ŋa iyi à màa à re ŋa.

⁷ Ilaaɔ̃, cɛ inyí nŋa nɔ i lɛgɛ kɛkɛlɛ nŋa, aŋa iyi à yɛ bɛi muusu nla ŋa.

⁸ Jɔ̀ a lɔ bɛi inyi iyi wa cã. Jɔ̀ afa ŋa iyi aa ta a kua gbugbã.

⁹ Jɔ̀ a yɛ bɛi godom iyi si isɛɛnɛɛ í ya na ku yɔ. Maà jɔ̀ a yɛ inunu bɛi ama iyi í ku à bɛi à búu.

¹⁰ Hee caka nŋɛ ŋau aa maa jo bɛi ama jĩi, Ilaaɔ̃ á ko ilu inɔ kukã ŋaui do fufu nla gɔ.

¹¹ Inɛ dee dee á wɛɛò inɔ didɔ̃ domi á yɛ Ilaaɔ̃ í sãa nŋu gbese. Nɔ á wiɛ kutɛɛ ŋai si njɛi ilu inɔ kukã ŋau.

¹² Nɔ inɛ fei á ni, ntɔi, inɛ dee dee á ba riba. Ntɔ ntɔ Ilaaɔ̃ í wɛɛ, nɔ nŋui á kiiti inɛi ilɛ ŋa.