Iri ku kɔ̃ 57 - Bibeli do fee

Ǹ wa n kpe Aɔ̃ Lafɛ̃ɛ iyi í wa hee lele

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu iyi wa ni, maà jɔ̀ ku ce nfe. Iriu wa fɔ idei waati iyi Davidi í ba í saa Saulu í koo í manji si isai kutau.

² Ce araarem Ilaaɔ̃, ce araarem, domi bi tɛɛi an ba bi ku manji jiida. Biim do ikpaɛ ŋa hee wahala ŋau a lɔ.

³ Aɔ̃ Lafɛ̃ɛ iyi í wa lelei ǹ wa n dɔ̃ si anu domi nŋui í ya ceem mii fei.

⁴ Hai lelei á na ku faabam baa do iyi mbɛɛm wa lelem fei. Kusĩmi. Aɔ̃ Lafɛ̃ɛ á nyisim jiida ku jɛɛ do ntɔɛ.

⁵ Ǹ wa si aninii inɛ kugaabu ŋa bɛi muusu nla ku ŋɔ amanɛ ŋa. Inyí nŋa í gbe anui bɛi kaka do afa. Amɛ̀ nŋa í yɛ bɛi taakuba iyi í dɔ̃ anu.

⁶ Ilaaɔ̃, nyisi kulaɛ iyi í re lelei Aɔ̃, nɔ i jɔ̀ amboeɛ ku wa si ilɛu fei sãa sãa.

⁷ Mbɛɛm ŋau à leem taa si kpãam nɔ hundem wa wahala. À tuum isa nla nla, amma aŋai à dasi ndu ŋa. Kusĩmi.

⁸ Ilaaɔ̃, naanɛm í wa siɛ. Naanɛm í wa siɛ ntɔ ntɔ. An kɔ̃ iri n maa n cĩɛ.

⁹ Hundem, jĩ hai si iri njoo. Kitigbom, mɔɔlɔm, iŋɛ mɔ i jĩ ŋa, domi ǹ nɛ n jĩ amɛɛjuumái.

¹⁰ Lafɛ̃ɛm, an maa n cĩɛi si inɔi inɛi ilɛ ŋa nɔ n kɔ̃ iri n maa n naɛ bɛɛrɛ si inɔi inɛi andunya ŋa,

¹¹ domi à waa yɛ jiida ku jɛɛi hee lelei Aɔ̃ nɔ bɛɛbɛ mɔi à waa yɛ ntɔ ku jɛɛ si kudũi ijĩ ŋa.

¹² Ilaaɔ̃, nyisi kulaɛ iyi í re lelei Aɔ̃, nɔ i jɔ̀ amboeɛ ku wa si ilɛu fei sãa sãa.