Iri ku kɔ̃ 56 - Bibeli do fee

Woo ba ijuukpã gɔ í so araɛ í daa Ilaaɔ̃ si awɔ

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu iyi wa fɔ idei ankasiidi iyi wa kpata hee lele jĩijĩ. Iriu wa fɔ idei waati iyi inɛi Filisi ŋa à mu Davidi ilui Gati.

² Ilaaɔ̃, ce araarem domi inɛ ŋa à waa lelem. Ajɔ fei à ya maa ce igũ do amui nɔ a maa taam gbugbã.

³ Ajɔ fei, mbɛɛm ŋa à ya maa dɛdɛɛm nii. Ilaaɔ̃ ilu gbugbã fei, inɛ ŋau à kpɔ nɔ à waa ce igũ do amu.

⁴ Ajɔ iyi zigim wa da, siɛi naanɛm í ya wa.

⁵ Ǹ wa n saabuɛi na ide iyi ì fɔ. Siɛi naanɛm í wa, n kù nɛ zigiidai nkãma. Mii amanɛ á yɔkɔ ku ceem.

⁶ Ajɔ fei, à ya maa bitandim nii do ide. Lasabu laalɔ iyi á ce nfem nii à ya maa ce.

⁷ À ce anu akã, à kãsim iju à waa dɛdɛm si na iyi í jɔ̀ à waa bi a kpam.

⁸ À waa tamaa mà si laalɔ ku ceu aŋa aa fita sii. Si idɔɔkɔ̃ɛ Ilaaɔ̃, ta ŋa ilɛ.

⁹ Bɛi ǹ wa n wu isɛm fei ì waa mà jiaɛ. Gba cikãajum si jɔlɔɛ. Ǹ mà kãm kãm iyi ì kɔ ŋa si tiaɛ.

¹⁰ Ilaaɔ̃, ajɔ iyi an tɔɔɛ faaba, mbɛɛm ŋa aa nyi do anyii domi ǹ mà kãm kãm iyi titom nii ì jɛ.

¹¹ Aɔ̃ Lafɛ̃ɛ, an saabuɛ na ideɛ ŋa iyi ì fɔu. Bɛɛbɛ mɔi an maa n saabuɛi na ideɛ ŋau.

¹² Ilaaɔ̃i ǹ dasi naanɛ, n kù wa n nɛ njoi nkãma. Mii amanɛ ŋa aa yɔkɔ a ceem.

¹³ Ilaaɔ̃, an kɔ̃ kuwã ŋa iyi n ceɛ. An ceɛ kuweei anu akã ŋa,

¹⁴ domi ì nyam hai si iku, ì jɔ̀ n kù cuku na mba n yɔkɔ n naa si wajuɛ si inya kumá iyi í ya jɔ̀ inɛ ku ba kuwɛɛ.