Iri ku kɔ̃ 55 - Bibeli do fee

Kutɔɔi inɛ gɔ iyi à zamba

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do mɔɔlɔ.

² Aɔ̃ Lafɛ̃ɛ, de itĩ i gbɔ kutɔɔm, maà manjiim waati iyi ǹ wa n tɔɔɛ.

³ De sim itĩ jiida nɔ i jɛɛm. Ǹ wa n bibii bii fei do weewea

⁴ na ide ku fɔi mbɛɛ do gbugbã iyi ilu inɔ kukã wa taam, domi à waa ceem laalɔ, nɔ do idɔɔkɔ̃i à waa yɛ taalem.

⁵ Ǹ wɛɛò inɔ kufɔ ntɔ ntɔ si idɔm, nɔ zigiidai iku í cuku sim wa.

⁶ Zigiida do kuyaya í wa sim ntɔ ntɔ, nɔ njo í mum ntɔ ntɔ.

⁷ Ŋɔi ǹ ni, bii í jɛ an ba ikpa bɛi ankasiidi wo, an foi n koo n dɛ bi kuwa.

⁸ Do yaase bɛɛbɛ an sai wo hee jĩijĩ n koo n wa si gbaa. Kusĩmi.

⁹ An sai ńya ńya n koo n dɛdɛ bi ku manji, na mba fufu nlau ihɛ̃ ku maà bam.

¹⁰ Aɔ̃ Lafɛ̃ɛ, fɔtɔtɔi anu akã nŋa nɔ i kpɛ̃ ŋa, domi si inɔ iluu, njɛ ku taa gbugbã do ija ŋai ǹ yɛ wa ce.

¹¹ À ya maa kaako bindiɛ ŋaui dasã do idũ. Si inɔ iluu, mii hai jɛ dee dee do laalɔ fei wa kɔ̃i.

¹² Inɛ ku kpai í wa si inɔ iluu. Nɔ zamba do bata ngba í wa si bantumaɛ ŋa.

¹³ Bii í jɛ mbɛɛm nii wa fɔ inɔm wo, an yɔkɔ n temua. Bii í nɔ í jɛ inɛ iyi í cém nii wa dɛdɛɛm wo, an sa n manjia.

¹⁴ Amma awɔ inɛm nii, iyi ǹ mà sãa sãa, nɔ awɔi ǹ ya n sɔ̃ asiim.

¹⁵ Awaɛ, njɛ ku gbɔa jiidai í wa si gãmɛ nwa, ajɔi à ya ka tako ka bɔ kpasɛ̃i Ilaaɔ̃ do zamaa.

¹⁶ Ilaaɔ̃, jɔ̀ iku ku zamba ŋa, nɔ a nɛ bi kuwai iku ŋa njaawɛ, domi inɔ kukãi wa kɔ̃ si idɔ nŋa.

¹⁷ Amu, Aɔ̃ Lafɛ̃ɛi an tɔɔ faaba á nɔ ku faabam.

¹⁸ Daakɔ, do dasã, do alɛ fei, si weeweai ǹ ya n maa n wa nɔ n maa n jilɛ idɔ, nɔ í gbɔ imum.

¹⁹ Do laakai ku sũi í ya hundem waati iyi zamaa nkpɔ í kaakom wa bam igũ ku ce.

²⁰ Aɔ̃ Lafɛ̃ɛ iyi wa buba si kitãi bommaɛ do ajɔ fei, wa gbɔ kutɔɔm nɔ á kɛkɛ ŋa, domi kaa ce inɛ ŋau a kpaasi idɔ si na iyi í jɔ̀ a kù mà bɛɛrɛɛ. Kusĩmi.

²¹ Woo zambau wa ba kpaasiɛ ŋa ku ja, nɔ í fũ akabuu iyi í dĩ do aŋa.

²² Ide didɔ̃i í ya wa si gɛlɛɛ, amma idei igũi í ya wa si idɔɛ. Ideɛ ŋau à dɔ̃ à re baa ikpo, amma à yɛi bɛi taakuba ku kpa inɛ.

²³ Aso iyi wa wɔɛ fei, koo sɔ̀ɔ bi Aɔ̃ Lafɛ̃ɛ. Nŋui á maa muɛ. Kaa jɔ̀ inɛ dee dee ku koosɛ.

²⁴ Ilaaɔ̃, awɔi aa jɔ̀ inɛ laalɔ ŋau a bɔ bi kuwai iku ŋa, nɔ woo kpa inɛ ŋau do woo zamba inɛ ŋau a ku do awaasũ. Amma amu, awɔ Ilaaɔ̃i ǹ wa n naanɛ.