Iri ku kɔ̃ 54 - Bibeli do fee

Faabai inɛ iyi à waa kpã iju

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do mɔɔlɔ.

² Iriu wa fɔ idei waati iyi inɛi Zifu ŋa à naa à sɔ̃ Saulu à ni Davidi í wa idei aŋa wa manji.

³ Ilaaɔ̃, faabam i nyisiò inɛ iyi ì jɛ, nɔ i jɔ̀ ntɔm ku fita gbugbãa do gbugbãɛ.

⁴ Ilaaɔ̃, de itĩ si idem ŋa nɔ i gbɔ kutɔɔm,

⁵ domi inɛ njoo ŋa à dede sim wa. Woo taa inɛ ŋa gbugbã ŋa à waa dɛ ku kpam. Lasabu nŋa kù wa siɛ mɔm. Kusĩmi.

⁶ Amma Ilaaɔ̃i á faabam nɔ á wɛɛ do inɛ ŋa iyi à waa sobim.

⁷ Awɔi aa jɔ̀ laalɔ ku cuku si mbɛɛm ŋa. Si dee dee ku jɛɛ, ce nfe nŋa mam mam.

⁸ An ceɛ kuweei do inɔ akã. Aɔ̃ Lafɛ̃ɛ, an saabuɛi si na iyi í jɔ̀ ì jɛ jiida,

⁹ domi ì nyam hai si ijuukpã baa yooma fei nɔ ǹ yɛ kucukui mbɛɛm ŋa.