Iri ku kɔ̃ 51 - Bibeli do fee

Kutɔɔi tuuba ku ce

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Iriu ihɛ̃ wa fɔ idei tuuba ku cei Davidi si anyii sakara iyi í ce do Baseba nɔ walii Natãa í bɔ bi titɛɛ.

³ Ilaaɔ̃, ceem didɔ̃ na jiida ku jɛɛ. Si araare nlaɛ, kpa idei kuraram ŋa.

⁴ Wɛm hai si kuraram ŋa sãa sãa jɔ̀ n maaju si dulum dom.

⁵ Ǹ mà kuraram ŋa, nɔ dulum dom í ya wai si wajum.

⁶ Bi awɔ akãi ǹ ce dulum. Si wajuɛi ǹ ce mii iyi kù sĩa, do yaase bɛɛbɛ, kiitiɛi í jɛ dee dee nɔ i kù nɛ taale si ijuukpãm.

⁷ Ntɔ ntɔ, si kurarai ǹ wa hai waati iyi iyem í so asĩm, nɔ í bím nii si dulum.

⁸ Amma iyi ì bii í jɛ ntɔ iyi í wa hee si lɛlɛi idɔ. Si lɛlɛi idɔm, jɔ̀ n mà bisiɛ.

⁹ Nya dulum dom do izɔpu nɔ n maaju. Wɛm, nɔ n má n re baa iwu tafa.

¹⁰ Jɔ̀ i ceem suuru nɔ i muum inɔ didɔ̃. An wa si jingau amu iyi ǹ kua gbugbã.

¹¹ Fa wajuɛ hai si dulum dom ŋa nɔ i kpa kuraram ŋa fei.

¹² Ilaaɔ̃, muum idɔ iyi í maaju nɔ i teese i mua idɔm gbugbã.

¹³ Maà lelem hai si wajuɛ, maà nya hunde kumáɛ sim.

¹⁴ Jɔ̀ n nɛ inɔ didɔ̃ iyi ǹ nɛ wo na faabam nɔ hunde jiidaɛ ku maa sobim.

¹⁵ Inɛ ŋa iyi à waa ce ide ku kɔ̀, an kɔ ŋa si kpãaɛ. Nɔ ilu dulum ŋa aa nyi wa bi tɛɛ.

¹⁶ Aɔ̃ Lafɛ̃ɛ woo faabam, jɔ̀ i nyam hai si inɛ ku kpa, nɔ gɛlɛm ku ya maa fɔ dee dee ku jɛɛ.

¹⁷ Aɔ̃ Lafɛ̃ɛ, cĩ gɛlɛm ku ba n maa n saabuɛ.

¹⁸ I kù bi kuwee ŋa. Bii ì bi wo, an naaɛ wa. Baa kuwee ŋa iyi à jo si ina fei sãa sãa i kù bi.

¹⁹ Kuwee ŋa iyi ì bii í jɛ idɔ ku kaye. Inɛ ŋa iyi à kaye ara nŋa nɔ à ce tuuba, i kaa kɔ̀si ŋa.

²⁰ Si jiida ku jɛɛ, cea Siɔ̃ɔ didɔ̃ɛ. Teese i ma bindii Zeruzalɛmu ŋau.

²¹ Waati bɛɛbɛ, aa nɛ inɔ didɔ̃ si kuwee ŋa iyi à jɛ dee dee. Kuwee ŋaui à jɛ kuweei mɛɛmu ŋa iyi à ya jo si ina fei sãa sãau, do kɛtɛ kombo ŋa iyi aa naaò wa bi ku ce kuweeɛu.