Iri ku kɔ̃ 5 - Bibeli do fee

Kutɔɔi inɛ iyi Aɔ̃ Lafɛ̃ɛ í gba

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do yee.

² Aɔ̃ Lafɛ̃ɛ, de itĩ si idem ŋau, nɔ i gbɔ kukpatam.

³ Awɔ Aɔ̃ Lafɛ̃ɛ ilaalum, awɔi ǹ wa n ba ide ku fɔ si kutɔɔm. Jɔ̀ i gbɔ anu ku dɔ̃i faaba iyi ǹ wa n tɔɔ.

⁴ Aɔ̃ Lafɛ̃ɛ, daakɔ fei ì ya gbɔ imum, nɔ daakɔ fei, ǹ ya n naa si wajuɛi n maa n degbe.

⁵ Awɔ Ilaaɔ̃, i ci ya bi laalɔ. Nɔ laalɔ ci ya ba bi kuwa bi tɛɛ.

⁶ Ilu faau ŋa a kaa yɔkɔ a leekĩ si wajuɛ, nɔ inɛ ŋa iyi à waa ce laalɔ fei ì cé ŋai.

⁷ Aɔ̃ Lafɛ̃ɛ, ì ya ce nfei woo sɔ ibo ŋai, nɔ ì cé woo kpa inɛ ŋa do woo zamba inɛ ŋa.

⁸ Amma amu an bɔ kpasɛ̃ɛ na jiida ku jɛ nla nlaɛ, n koo n sɛɛbata do jirima si kpasɛ̃ kumáɛ.

⁹ Aɔ̃ Lafɛ̃ɛ, jɔ̀ i maa nɛɛm si dee dee ku jɛɛ, na irii inɛ ŋa iyi à waa cɔ isɛɛnɛm. Jɔ̀ i teese kpãaɛ si wajum,

¹⁰ domi ntɔ kãma kù wa si ide ku fɔ nŋa. Inɔ nŋa kù nɛ nkãma í gbe nfe ku ce. Gbangɔlɔ nŋa í yɛi bɛi balɛ foo nɔ idei amɛ nŋa, ide ku kpa inɛi.

¹¹ Ilaaɔ̃, jɔ̀ i yɛ taale nŋa, nɔ kuce nŋa ku jɔ̀ a cuku. Kɔ̀si ŋa na laalɔ hai nɛ jia iyi à ce domi à dedeò ide ku kɔ̀ si gãmɛɛ.

¹² Na nŋu inɛ ŋa iyi à wa bi tɛɛ fei aa maa wɛɛi si inɔ didɔ̃. Inɔ didɔ̃ nŋa kaa nɛ kɔɔ domi awɔi aa maa degbe ŋa. Inɛ ŋa iyi à bi ideɛ fei aa wɛɛò inɔ didɔ̃i na iriɛ.

¹³ Awɔ Aɔ̃ Lafɛ̃ɛ, ì ya weea inɛ dee dee. Jiidaɛ í yɛ bɛi tɛli iyi wa degbeɛ.