Iri ku kɔ̃ 48 - Bibeli do fee

Bi kuwai ilaalu nlau

¹ Iriu ihɛ̃ ti amai Kore ŋai.

² Aɔ̃ Lafɛ̃ɛ í la, í to a cũu si iluɛ si iri kuta kumáɛu.

³ Si kusĩaɛ, nŋui wa na inɛi ilɛ ŋa fei inɔ didɔ̃. Iri kutai Siɔ̃ɔu í wai do ikpa awɔ njɛi kpãai inunu. Ilui ilaalu nlaui.

⁴ Aɔ̃ Lafɛ̃ɛ si bi kuwaɛ í jɔ̀ à mà gbugbãɛ.

⁵ Ilaalu ŋa à tɔtɔɔ njɛ à naa igũ ku ce si ilui Siɔ̃ɔ.

⁶ Iyi à cɔ ilu gbakã à biti, ŋɔi zigi nŋa í da nɔ à sa.

⁷ Bɛ, à waa yaya bɛi inaabo iyi wa gbɔ ara kuroi kubí,

⁸ nɔ à cei má bɛi akɔi inyi ŋa iyi fufu nlai nunui daakɔ í ya lɛgɛ.

⁹ Iyi à gbɔ inɛ ŋa à fɔu, à yɔɔi si ilui Aɔ̃ Lafɛ̃ɛ nwa, Aɔ̃ Lafɛ̃ɛi lele do ilɛ. Ilaaɔ̃ á muaa gbugbãi hee do ajɔ fei. Kusĩmi.

¹⁰ Ilaaɔ̃, si inɔ kpasɛ̃ɛi à ya ka maa wa ka maa lasabu si jiida ku jɛɛ.

¹¹ Inɛ ŋa à waa cĩɛ hee si kɔɔi andunya fei. Dee dee ku jɛɛ í caa.

¹² Inɛi iri kutai Siɔ̃ɔ ŋa do inɛi ilui Zudaa ŋa à wɛɛò inɔ didɔ̃ nla nla na kiitiɛ ŋa iyi à jɛ dee dee.

¹³ I kaako Siɔ̃ɔ ŋa nɔ i ka ile ku nɛ gbugbãɛ ŋa si bii soogeɛ ŋa à wau.

¹⁴ I cɔ bindiɛ, nɔ i cɔ ile ku nɛ gbugbãɛ ŋau ku ce ncɛɛ, ku ba i sisia tɔkui ala nŋɛ ŋa.

¹⁵ Ilaaɔ̃u ihɛ̃i í jɛ Lafɛ̃ɛ nwa hee do ajɔ fei. Nŋui á maa mu wa hee do ajɔ fei.