Iri ku kɔ̃ 46 - Bibeli do fee

Aɔ̃ Lafɛ̃ɛ ilu gbugbã fei í wɛɛ do awa

¹ Iriu ihɛ̃ ti inɛ ngboi woo kɔ̃ iri ŋai do amai Kore ŋa. À ya kɔ̃ɔi do imu ngbɛ.

² Aɔ̃ Lafɛ̃ɛi í jɛ bi ku manji ku nɛ gbugbã nwa. Í ya sobi wai waati iyi à wa si inɔ kufɔ fei.

³ Na ŋɔi í ce waati iyi ilɛ wa yaya, nɔ iri kuta ŋa mɔ à yaya hee si inɔ tenku, zigi nwa kù da.

⁴ Nɔ waati iyi inyi ŋau à ce iba, à dede nɔ à yaga iri kuta ŋa, zigi nwa kù da. Kusĩmi.

⁵ Ido nla gɔi iyi wa na ilui Ilaaɔ̃ inɔ didɔ̃ si kpasɛ̃ kumáɛ hee lele bii Ilaaɔ̃ í wau.

⁶ Ilaaɔ̃ í wa si aninii iluu, na ŋɔi í jɔ̀ iluu kaa cuku. Hai amɛɛjuumá gbakã, í ya wa bɛi ku maa sobiɛ.

⁷ Inɛi ilɛ ŋa à ce iba, bomma ŋa à yaya, à gbɔ imui Ilaaɔ̃, nɔ ilɛ í yɔ.

⁸ Aɔ̃ Lafɛ̃ɛi lele do ilɛi í wɛɛ do awa. Ilaaɔ̃ Lafɛ̃ɛi Zakɔbui í jɛ bi ku manji ku nɛ gbugbã nwa. Kusĩmi.

⁹ I naa i cɔ icɛ iyi Aɔ̃ Lafɛ̃ɛ í ce ŋa. Tɔtɔ ku fɔ iyi í ce si ilɛ.

¹⁰ Aɔ̃ Lafɛ̃ɛi í ya leekĩ igũ si andunya fei, nŋui í ya cɛ biooi igũ ŋa, nɔ í ya cɛ kaka ŋa. Í ya jɔ̀ ina ku jo sarɛti ku ce igũ ŋau.

¹¹ Nŋui í ni, i leekĩ nɔ i mà ŋa iyi amui ǹ jɛ Aɔ̃ Lafɛ̃ɛ. Amui ǹ kãmia dimi ŋa nɔ ǹ kãmia andunyau fei.

¹² Aɔ̃ Lafɛ̃ɛi lele do ilɛi í wɛɛ do awa. Ilaaɔ̃ Lafɛ̃ɛi Zakɔbui í jɛ bi ku manji ku nɛ gbugbã nwa. Kusĩmi.