Iri ku kɔ̃ 45 - Bibeli do fee

Irii abɔdɔ̃i ilaalu

¹ Iriu ihɛ̃ ti inɛ ngboi woo kɔ̃ iri ŋai do amai Kore ŋa. À ya kɔ̃ɔi do mɔɔlɔ. Iriu irii kubii.

² Idɔm wa yaya na laabaau didɔ̃ do ide jiida ŋa iyi an fɔ bi ilaalu. Nɔ ǹ bi gɛlɛm ku yɛi bɛi mii ku kɔi woo mà kukɔ jiida.

³ Awɔi ì sĩa ì re inɛ fei, nɔ ide didɔ̃i í wa si gɛlɛɛ, na ŋɔi í jɔ̀ Ilaaɔ̃ í weeɛ hee do ajɔ fei.

⁴ Awɔ woo ja igũ jiida, dĩ taakubaɛ si cingaaɛ. Nŋui í jɛ yiikoɛ do bɛɛrɛɛ.

⁵ Ntɔ ntɔ, dede do gbugbãɛ i gũ sarɛtii igũɛ i bɔò igũ na mba i jɔ̀ dee dee ku jɛ ku wɛɛ do ara ku kaye do ntɔ. Gbugbãɛi á jɔ̀ i jɛ igũ.

⁶ Afaɛ ŋa à gbe anu, à waa lu idɔi mbɛɛɛ ŋa nɔ inɛ ŋa à wasi ku cuku.

⁷ Ilaaɔ̃, bommaɛ á maa wɛɛi do ajɔ fei. Do dee dee ku jɛi ì waa muò bommaɛ.

⁸ Ì bi iyi í jɛ dee dee nɔ ì cé kuce laalɔ ŋa. Na ŋɔi í jɔ̀ Aɔ̃ Lafɛ̃ɛɛ í cicaɛ ikã, do inɔ didɔ̃ í tontooɛ ikpo si iri í nyaɛ ikã hai si inɔi kpaasiɛ ŋa.

⁹ Tuae ku dɔ̃ inunu dimi ikã ikãi í wa si jĩnɛɛ ŋa iyi ì waa dasi. Irii inɔ didɔ̃ iyi à waa kɔ̃ɛ wa fita wai hai si kabai bommaɛ iyi à ce si booda do inyíi jua.

¹⁰ Ama inaaboi ilaalu ŋa à wa bɛ à waa dasi jĩnɛ ku nɛ bɛɛrɛɛ ŋa, nɔ iyeɛ í wa awɔ njɛɛ wa dasi jĩnɛi wurai ilɛi Ɔfii.

¹¹ Ama inaabom, cɔ, nɔ i de itĩ do laakai i gbɔ, maà ce lasabui inɛɛ ŋa walakɔ nyaanzei baaɛ ŋa.

¹² Lasabui ilaalu si kusĩaɛi í wa. Si bɛi nŋui í jɛ lafɛ̃ɛɛ, i ya sɛɛbata si wajuɛ.

¹³ Ilu amani nlai Tii ŋa aa dɛdɛ a ceɛ amua ŋa ku ba a ba didɔ̃ɛ.

¹⁴ Ama inaaboi ilaalu mmu gɔ í wa inɔ kabai ilaaluu wa buba do bɛɛrɛ nla nla. Wa dasi jĩnɛ iyi à ce si boodai wura.

¹⁵ À gbã à waa naɛ wa bi ilaalu wa dasi jĩnɛ iyi à ce si ila ikã ikã. Nɔ mudɛ̃ɛ kpaasiɛ ŋa à waa tooɛ wa.

¹⁶ À gbã ŋa wai do anu ku dɔ̃i inɔ didɔ̃ nla nla à lɔò ŋa wa si inɔ kabai ilaaluu.

¹⁷ Ilaalu, ama inɛmɔkɔɛ ŋai aa na a gba agbɛi balaɛ ŋa. Awɔi aa ce ŋa inɛ ngbo ŋa si ilɛu fei.

¹⁸ An maa n ye gigii iriɛi si tɔku ŋa fei. Nɔ inɛ ŋa aa maa saabuɛi hee do ajɔ fei.