Iri ku kɔ̃ 44 - Bibeli do fee

Do nŋu fei ì kɔ̀si wa

¹ Iriu ihɛ̃ ti inɛ ngboi woo kɔ̃ iri ŋai do amai Kore ŋa.

² Ilaaɔ̃, à gbɔ do itĩ nwa baa nwa ŋa do bala nwa ŋa à sisi nwa icɛ iyi ì ce wo si waati nŋa.

³ Awɔi ì lele inɛi ilɛ gɔ ŋa ì bɛi ì buba inɛɛ ŋa bɛ. Ì kpã inɛi ilɛ ŋau ijui ì bɛi ì jilɛ inɛɛ ŋa bɛ ku ba akpɔ nŋa ku kɔ̃ɔsi.

⁴ Kù jɛ do taakubai bala nwa ŋa à gba ilɛu í jɛ tu ŋa. Kù jɛ awɔ nŋai í jɔ̀ à jɛ igũ. Amma si na iyi í jɔ̀ ì wa anyi nŋa do awɔ gbugbãɛ do inya kumái wajuɛi nɔ ì nɛ kubi nŋa.

⁵ Ilaaɔ̃, awɔi ì jɛ ilaalum. Awɔi ì ya sobi tɔkui Zakɔbu ŋa a bɛi a jɛ igũ.

⁶ Do saabuɛi aa ka kɛkɛ mbɛɛm nwa ŋa, do iriɛi aa ka tɛɛsɛ ŋa.

⁷ Kù jɛ si bioom nii naanɛm í wa, kù nɔ kù jɛ taakubam nii á faabam.

⁸ Amma awɔi ì ya faaba wa hai bi mbɛɛ nwa ŋa, nɔ do anyɔi ì ya bii inɛ ŋa iyi à cé wa ŋau.

⁹ Ajɔ fei à ya ka maa saabuɛi, nɔ à ya ka maa na iriɛ bɛɛrɛi waati kãma fei. Kusĩmi.

¹⁰ Do nŋu fei, ì kɔ̀si wai, ì jɔ̀ à dasi biti, i kù sì sooge ku ja igũ nwa ŋa.

¹¹ Ì jɔ̀ à nyi do anyi si wajui mbɛɛ nwa ŋa, nɔ inɛ ŋa iyi à cé wa à ko amani nwa fei.

¹² Ì dasi wa si awɔ nŋa bɛi angudã ŋa iyi aa koo a kpa, nɔ ì fangaa wa si ilɛ mmu ŋa.

¹³ Wee ì ta inɛ ŋa faala, nɔ i kù ba riba kãma.

¹⁴ Ì ce wa hai nɛ bɛɛrɛ bi inɛi kɔkɔ nwa ŋa, nɔ à jɛ dɔ̃anyi bi inɛ ŋa iyi à waa kaako wa.

¹⁵ Ì jɔ̀ à jɛ dɔ̃anyi ŋa si dimi ŋa nɔ à ya bu wai a maa gbugbãò iri.

¹⁶ Ajɔ fei si bitii ǹ ya n wa nɔ anyɔi í ya bii wajum,

¹⁷ waati iyi ǹ wa n gbɔ mbɛɛ wa bu wa, wa yaako wa nɔ wa ce ide ku kɔ̀ si gãmɛ nwa fei.

¹⁸ Iyi bɛ fei í ba wa, amma a kù gbɛjɛ ideɛ nɔ a kù dede si akabuuɛ.

¹⁹ Si isɛɛnɛ nwa a kù nyi do anyi nɔ a kù yaa hai si kpãaɛ.

²⁰ Amma ì tɛɛsɛ wai bi kuwai ajaako ŋa, nɔ ì bii wa do jĩjĩi iku.

²¹ Bii í jɛ à gbɛjɛ irii Aɔ̃ Lafɛ̃ɛ nwa walakɔ à koo à tɔɔ iwɛ̃ gɔi,

²² Ilaaɔ̃ nŋu iyi í mà asii ŋa iyi à wa si idɔi amanɛ, kaa yɔɔi?

²³ Ajɔ fei, na iriɛ si anui ikui à ya ka maa wa alɛò daakɔ, à waa cɔ wai bɛi angudã ŋa iyi à waa bɔ ku saka.

²⁴ Aɔ̃ Lafɛ̃ɛ, dede. Na mii í ce ì waa sĩ njoo. Jĩ hai si iri njoo. Maà kɔ̀si wa hee do ajɔ fei.

²⁵ Na mii í ce ì fa wajuɛ hai bi tu wa. Na mii í ce ì gbɛjɛ wahala nwa do inɔ kufɔ nwa.

²⁶ Ntɔ ntɔ à wa ilɛ nɔ ilùlù í bii wa. Ara nwa í wa ilɛ.

²⁷ Dede i faaba wa nɔ i nya wa na jiida ku jɛɛ.