Iri ku kɔ̃ 42 - Bibeli do fee

IKƆ̃ MINJISIAI TIAU ( Iri ku kɔ̃ 42-72 ) Bɛi kulu iyi wa jilɛ idɔ na wahala

¹ Iriu ihɛ̃ ti inɛ ngboi woo kɔ̃ iri ŋai do amai Kore ŋa.

² Bɛi kulu iyi agbɛ wa kpa ntɔ ntɔ í ya bɔ ido inyi ku dɛ, bɛɛbɛi amu mɔ ǹ wa n dɛdɛ Ilaaɔ̃ ntɔ ntɔ.

³ Ǹ wa n ce bɛgɛi Ilaaɔ̃ nŋu iyi í jɛ icui kuwɛɛ. Waati yoomai an bɔ si wajui Ilaaɔ̃.

⁴ Idũ do dasã, cikãajui í ya jɛ sɔndam, domi inɛ ŋa à ya beem a maa ni hee iwoi Ilaaɔ̃ Lafɛ̃ɛm nɔu í wa.

⁵ Wee do nŋu fei, ǹ wa n ye gigii bɛi idɔm í dede waati iyi zamaa í kaakom nɔ ǹ cua nŋa à waa bɔ kpasɛ̃i Ilaaɔ̃, à dɔ̃ anu do inɔ didɔ̃ nɔ à waa saabu Ilaaɔ̃ ajɔ.

⁶ Na mii í jɔ̀ an maa n wɛɛò inɔ kufɔ, na mii í jɔ̀ an maa n weewea. Kpãa ku cɔm si Ilaaɔ̃i á wa. An saabuɛ má, domi nŋui í jɛ woo faabam.

⁷ Lafɛ̃ɛm, inɔm í fɔ, na ŋɔi í jɔ̀ ǹ wa n ye gigiɛ wa hai idoi Zuudɛ̃ɛ do hai iri kutai Hɛɛmɔɔ do hai iri kutai Miseaa.

⁸ Awɔi ì ya jɔ̀ inyii ido ŋa à tɔtɔɔ si njɛ a maa dɔ̃ anu. Aŋa fei à waa kuam nii mam mam.

⁹ Aɔ̃ Lafɛ̃ɛ wa nyisim jiida ku jɛɛ dasã, nɔ idũ ǹ ya n maa n kɔ̃a iri n maa n cũui, n maa n tɔɔɛ, nŋu iyi í jɔ̀ ǹ wɛɛ.

¹⁰ Ilaaɔ̃, awɔi ì jɛ kuta ku nɛ gbugbãm. Na mii í jɔ̀ ì gbɛjɛm, na mii aa jɔ̀ mbɛɛm ku maa tɛɛsɛm, nɔ n maa n nɛ si inɔ kufɔ.

¹¹ Ǹ kua gbugbã ntɔ ntɔ waati iyi mbɛɛm ŋa à waa fɔ inɔm, à beem à waa ni hee iwoi Ilaaɔ̃ Lafɛ̃ɛm nɔu í wa.

¹² Na mii í jɔ̀ an maa n wɛɛò inɔ kufɔ, na mii í jɔ̀ an maa n weewea. Kpãa ku cɔm si Ilaaɔ̃i á wa. Nɔ an sisi n saabuɛ mái domi nŋui í jɛ Lafɛ̃ɛm do woo faabam.