Iri ku kɔ̃ 41 - Bibeli do fee

Kutɔɔi inɛ iyi í wa si ijuukpã

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Ilu inɔ didɔ̃i inɛ iyi lasabuɛ í ya maa wa si hai nɛ gbugbã ŋa. Ajɔ iyi inɔ kufɔ á to wa siɛ, Aɔ̃ Lafɛ̃ɛi á faabaɛ.

³ Aɔ̃ Lafɛ̃ɛi á maa degbeɛ nɔ á maa mu kuwɛɛɛ. Si ilɛu ihɛ̃ á nɛ inɔ didɔ̃ si kuwɛɛɛ. Aɔ̃ Lafɛ̃ɛ kaa jɔ̀ ku dasi awɔi mbɛɛɛ.

⁴ Waati iyi wa sũ do ara kuro, Aɔ̃ Lafɛ̃ɛi á degbeɛ. Si bɔ̃ɔɛu nŋui á maa muu.

⁵ Ǹ ni, Aɔ̃ Lafɛ̃ɛ, ceem didɔ̃. Ǹ nɛ bukaatai i jɔ̀ n ba iri, domi ǹ ce dulum bi tɛɛ.

⁶ Mbɛɛm ŋa à waa fɔɔm ide sãmi à waa ni waati yoomai an ku, nɔ a gbɛjɛ idem.

⁷ Bii inɛ gɔ í naa bi tom, ide ngbɛ ngbɛi í ya fɔ. Si idɔɛ laalɔi í ya maa kɔ̃, nɔ bii í fita waduude gbakã nŋui í ya maa fɔ.

⁸ Inɛ ŋa iyi à cém à tɔtɔɔ à waa busi njɛ na irim, nɔ à waa lasabu si laalɔ iyi á na ku bam.

⁹ À ni ide laalɔi á bam. Bii ǹ wa n sũu ihɛ̃, n kaa n dede má pai.

¹⁰ Baa kpaasi jiidam iyi ǹ wa n naanɛ, nŋu iyi awaò à ya ka jɛi, í baa í jɛ mbɛɛm.

¹¹ Amma Aɔ̃ Lafɛ̃ɛ, ǹ wa n tɔɔɛi, ceem didɔ̃ n ba n dede, nɔ n sã ŋa iyi í jɔ ku ba ŋa.

¹² Bii mbɛɛm kù yɔkɔ kù kãmiam, waati bɛɛbɛ an mà iyi ì nɛ kubim.

¹³ Awɔi aa sobim si dee dee ku jɛm nɔ i maa mum bi tɛɛ hee do ajɔ fei.

¹⁴ Saabu ku jɛ ti Aɔ̃ Lafɛ̃ɛi inɛi Izirɛli ŋa hee do ajɔ fei. Ami. Ami.