Iri ku kɔ̃ 40 - Bibeli do fee

Jɔ̀ inɛ fei ku mà mii iyi ì ceem

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Kpãa ku cɔm fei, si Aɔ̃ Lafɛ̃ɛi í wa, nɔ í gbɔ anu ku dɔ̃m.

³ Í nyam hai si isai nfe ku ce do hai si pɔkɔdɔ. Í jɔ̀ ǹ wa n leekĩ si antaii kuta. Nɔ í jɔ̀ ǹ wa n nɛ do naanɛ.

⁴ Aɔ̃ Lafɛ̃ɛi í jɛ Lafɛ̃ɛ nwa, í daam iri titɔ̃ si gɛlɛ iyi an kɔ̃ n saabuɛò. Inɛ nkpɔi á yɔɔ, nɔ aa jirimaɛ. Waati bɛɛbɛi aa dasiɛ naanɛ.

⁵ Ilu inɔ didɔ̃i inɛ iyi í dasi Aɔ̃ Lafɛ̃ɛ naanɛ, nɔ kù waa too ilu faau ŋa do ilu ibo ŋa.

⁶ Aɔ̃ Lafɛ̃ɛm, jiida ŋa iyi ì ce na iri nwa à kpɔ. Inɛ kãma kù wɛɛ iyi aa wãɛò. Ǹ bi n sisi n sɔ̃ inɛ ŋa, n sisi ŋa má, wee kukpɔ nŋa í caa í jɔ̀ n kaa n yɔkɔ n kà ŋa.

⁷ Aɔ̃ Lafɛ̃ɛ, kù jɛ kuwee walakɔ amuai ì bi, kù nɔ kù jɛ kuwee ŋa iyi à ya jo si ina fei sãa sãai walakɔ kuweei dulum ku kpai ì bi, amma de ì cĩ itĩm.

⁸ Na ŋɔi í jɔ̀ ǹ ni, amu wee ǹ wa n naa bi tɛɛ. Si tia iyi à káu ǹ yɛ à kɔ mii iyi ǹ nɛ ku ce.

⁹ Aɔ̃ Lafɛ̃ɛm, woodaɛ ŋa à wai si lɛlɛi idɔm nɔ idɔɔbiɛ ku cei ǹ bi.

¹⁰ Aɔ̃ Lafɛ̃ɛ, bii inɛɛ ŋa à tɔtɔɔ, an sisi laabaau jiida iyi í jɛ ti faaba. Nɔ ì mà kãm kãm iyi n kaa n yɔkɔ n coko.

¹¹ N kaa n singa dee dee ku jɛɛ si idɔm. An fɔ idei faabaɛ do dee dee ku jɛɛi, n kaa n singa jiida ku jɛɛ do ntɔɛ bii inɛɛ ŋa à tɔtɔɔ.

¹² Awɔ Aɔ̃ Lafɛ̃ɛ, i kaa kɔ̀ɔm didɔ̃ɛ. Jiidaɛ do ntɔɛ ŋai aa maa mum ajɔ fei.

¹³ Wahala ŋa à kaakom nii hai do bii fei hee n kaa n yɔkɔ n ka ŋa. Ribai kuraram ŋaui wa bam nɔ n kaa n yɔkɔ n maa n cɔɔ. À kpɔ à re baa ntoi irim ŋa nɔ ǹ kua gbugbã.

¹⁴ Aɔ̃ Lafɛ̃ɛ, naa i faabam. Aɔ̃ Lafɛ̃ɛ, ce ńya i naa i sobim.

¹⁵ Jɔ̀ inɛ ŋa iyi à waa dɛ ku kpam ŋau, a yɛ anyɔ do inɔ kufɔ. Inɛ ŋa iyi à waa dɛdɛm do laalɔ, jɔ̀ a nyi do anyi si biti nla nla.

¹⁶ Inɛ ŋa iyi à waa nyaanyim, jɔ̀ a nyi do anyi si anyɔ.

¹⁷ Jɔ̀ inɛ ŋa iyi à waa dɛdɛɛ fei a nɛ inɔ didɔ̃ nla nla siɛ. Inɛ ŋa iyi à bi ideɛ, awɔ woo faaba nwa, jɔ̀ a fɔ a maa ni, Aɔ̃ Lafɛ̃ɛ í la.

¹⁸ Amu, ilu inɔ kufɔi nɔ n kù nɛ gbugbã, amma Aɔ̃ Lafɛ̃ɛ wa muum gbugbã. Aɔ̃ Lafɛ̃ɛ, awɔi ì jɛ woo faabam do woo gbam, Ilaaɔ̃ Lafɛ̃ɛm, maà kpɛ.