Iri ku kɔ̃ 39 - Bibeli do fee

Kuwɛɛ í kandaa í caa, jɔ̀ n mɔsi

¹ Iriu ihɛ̃ ti inɛ ngboi woo kɔ̃ iri ŋai do Yedutunu do Davidi.

² Ǹ ya n maa n nii wo, an maa n ce laakaii isɛɛnɛm do ide ku fɔm nii ku ba n maà n dasi dulum waati iyi inɛ laalɔ gɔ í wa bi tom.

³ Ǹ coko bɛi hai fɔ ide, amma n kù ba nkãma í gbe ara kurom iyi í kɔ̃ɔsi.

⁴ Idɔm wa jom hee lɛlɛ. Lasabum í dede bɛi ina. Nɔ iyi bɛi í jɔ̀ ǹ fɔ ide ǹ ni,

⁵ Aɔ̃ Lafɛ̃ɛ, jɔ̀ n mà waati iyi kuwɛɛm á leekĩ. Ntɔ ntɔ, waati fɛloi wa gbeem. Do yaase bɛɛbɛ an mà iyi n kù jɛ nkãma.

⁶ Wee ì ni kuwɛɛ iyi ì nam kù re kucĩi ataawɔ, kuwɛɛm kù jɛ nkãma bi titɛɛ. Ntɔ ntɔ amanɛ baa yooma iyi í wɛɛ fei, í yɛi bɛi fufu. Kusĩmi.

⁷ Ntɔ ntɔ, amanɛ í ya maa nɛi bɛi jĩjĩ. Í ya maa wahala araɛi ngbɛ ngbɛ. Wa tɔtɔɔ amani nɔ kù mà inɛ iyi á jɔ́ɔ.

⁸ Aɔ̃ Lafɛ̃ɛ, si mii kpãa ku cɔm í wa má. Siɛi naanɛm fei í wa.

⁹ Nyam hai si wooda ku kuam ŋa fei. Maà jɔ̀ n jɛ dɔ̃anyii nnyɛi ŋa.

¹⁰ Nsɛi ǹ coko, n kaa n fɔ ide má, domi awɔi ì ce fei ndɛɛ.

¹¹ Leekĩ ku cãm bɛɛbɛ, domi an na n ku.

¹² Ì ya kpã amanɛ ijui na kuraraɛ ŋa. Mii jiida iyi amanɛ í bi ì ya bɛjɛɛi bɛi tũtũ. Ntɔ ntɔ, kuwɛɛi inɛ baa yooma fei í yɛi bɛi fufu. Kusĩmi.

¹³ Aɔ̃ Lafɛ̃ɛ, gbɔ kutɔɔm, nɔ i de itĩ si anu ku dɔ̃m ŋa. Si kukpatam ŋau, maà coko, domi ǹ jɛ isɛ mmu bi tɛɛ. Ǹ wa ihɛ̃i si waati keeke bɛi balam ŋau fei.

¹⁴ Jɔ̀ɔm afe keeke n nɛ inɔ didɔ̃ má hee n maa n ku.