Iri ku kɔ̃ 38 - Bibeli do fee

Kutɔɔi baa bɔ̃ɔ gɔ iyi í mà kuraraɛ ŋa

¹ Irii gigi ku yeu ihɛ̃ ti Davidii.

² Aɔ̃ Lafɛ̃ɛ, si idɔɔkɔ̃ɛ, maà yɛ taalem nɔ maà kpãm iju.

³ Afaɛ ŋa à cuku sim wa nɔ awɔɛ í cã í kɛkɛm ilɛ.

⁴ Aram kù wɛɛ si agbɛɛ má na idɔɔkɔ̃ɛ, na irii dulum dom, kũkũi aram ŋa à kua gbugbã.

⁵ Kuraram ŋa à la, nɔ à wo hee à caa. Kuwo nŋau wa tɛm bɛi aso kuwo.

⁶ Jujum ŋa à sãmi à waa nu na irii mii hai nɛ yaase iyi ǹ ce.

⁷ N kù nɛ gbugbã, ǹ wa si inɔ kufɔ nla nla, nɔ ajɔ fei si inɔ kufɔi ikui ǹ ya n maa n wa.

⁸ Ǹ wa n gbɔ inya gbãa si kpaam ŋa. Aram kù wɛɛ si agbɛɛ má.

⁹ Na bitandii idɔm ǹ wa n wahala, ǹ gbɛɛji ntɔ ntɔ, nɔ ǹ kua gbugbã.

¹⁰ Aɔ̃ Lafɛ̃ɛ, ì waa yɛ mii iyi ǹ bi fei, nɔ wahalam kù waa manjiɛ.

¹¹ Idɔm wa cã do gbugbã, gbugbãm í kaye, nɔ baa ijum ŋa a kù waa yɛ ilu má.

¹² Kpaasim ŋa do inɛi anyim ŋa à jĩim na jujum ŋau. Inɛi kɔkɔm ŋa à sa à jĩim.

¹³ Inɛ ŋa iyi à bi ikum, à leem cɛkũm. Inɛ ŋa iyi à waa bi laalɔ ku bam, à ya maa fɔ ide laalɔ si gãmɛm nii a maa bum ajɔ fei.

¹⁴ Amma amu, ǹ ce bɛi dekĩ iyi kù waa gbɔ ide. Bɛi inɛ iyi kaa yɔkɔ ku fɔ ide, n kù ni ide gɔ.

¹⁵ Ǹ yɛi bɛi inɛ iyi kù waa gbɔ ide, nɔ n kù fɔ ide kãma.

¹⁶ Aɔ̃ Lafɛ̃ɛ, siɛi naanɛm í wa. Aɔ̃ Lafɛ̃ɛm, awɔi aa jɛɛm.

¹⁷ Ǹ sɔ̃ɛ ǹ ni, maà jɔ̀ mbɛɛ ŋa à dede sim, waati iyi ǹ koosɛ, a maà nyaanyi.

¹⁸ Ǹ mà kãm kãm iyi an koosɛ domi ara kurom nɔu kù sɛkɛɛ.

¹⁹ Ǹ ce tuubai kuraram, kuraraui í jɔ̀ ǹ wɛɛò zigiida ntɔ ntɔ.

²⁰ Mbɛɛm ŋa à nɛ baani do gbugbã. Inɛ ŋa iyi à cém ngbɛ ngbɛ à kpɔ.

²¹ Iyi ǹ ce nŋa jiida, laalɔi à waa sãam. Waati iyi ǹ wa n ce jiida, a ci ya bi.

²² Aɔ̃ Lafɛ̃ɛm, maà fũsim awɔ. Maà jĩim.

²³ Aɔ̃ Lafɛ̃ɛ, awɔi ì jɛ woo faabam. Naa i sobim gbãa gbãa.