Iri ku kɔ̃ 37 - Bibeli do fee

Maà jɔ̀ waju ku bɔi ilu inɔ kukã ŋa ku kɔ̃ idɔɛ

1 Iriu ihɛ̃ ti Davidii.

¹ Iriu ihɛ̃ ti Davidii. Maà jɔ̀ idɔɛ ku kɔ̃ si inɛ ŋa iyi à waa ce laalɔ, maà jɔ̀ kɔdɛɛ ku wa si inɛ laalɔ ŋau.

² À yɛi bɛi kokoi jĩi iyi í ya wɔ gbãa gbãa, nɔ à yɛi má bɛi fɔfɔ tũtũ iyi í gbɛ.

³ Dasi Aɔ̃ Lafɛ̃ɛ naanɛ nɔ i maa ce mii iyi í sĩa. Wa si ilɛu nɔ i maa jɛ kuwɛɛɛ si dee dee ku jɛ.

⁴ Jɔ̀ inɔ didɔ̃ɛ ku wa si Aɔ̃ Lafɛ̃ɛ, á muuɛ mii iyi ì bi si idɔɛ.

⁵ Daa Aɔ̃ Lafɛ̃ɛ kuwɛɛɛ fei si awɔ, dasiɛ naanɛ, á sobiɛ.

⁶ Á jɔ̀ dee dee ku jɛɛ ku yɛi bɛi inya kumái daakɔ. Nɔ ntɔ iyi ì nɛ ku fita gbugbãa bɛi inunui dasã.

⁷ Mu araɛ cau si wajui Aɔ̃ Lafɛ̃ɛ, degbeɛ do temua. Maà jɔ̀ idɔɛ ku kɔ̃ si waju ku bɔi inɛ gɔ ŋa, walakɔ bii inɛ gɔ ŋa à waa ce lasabu laalɔ.

⁸ Jɔ̀ idɔɔkɔ̃ ku ce, fũsi awɔ. Idɔɔkɔ̃ ku ce laalɔi í ya kpaò iri.

⁹ Inɛ ŋa iyi à waa ce laalɔ fei aa kui. Amma inɛ ŋa iyi kpãa ku cɔ nŋa í wa si Aɔ̃ Lafɛ̃ɛ, aŋai aa nɛ ilɛu.

¹⁰ Í gbe waati keeke ilu inɔ kukã kãma kaa wɛɛ má. Aa dɛdɛ ŋa ntɔ ntɔ i kaa yɛ baa inɛ akã.

¹¹ Inɛ ŋa iyi à kaye ara nŋa, aŋai aa nɛ ilɛu, nɔ aa wa bɛi do laakai ku sũ nla nla.

¹² Ilu inɔ kukã lasabu laalɔi í ya maa ce na inɛ dee dee, nɔ í ya maa ŋɔ inyíi na iriɛ.

¹³ Aɔ̃ Lafɛ̃ɛ wa nyaanyiɛ domi wa yɛ iyi ajɔi kiitiɛ í maai wa.

¹⁴ Ilu inɔ kukã ŋa à ya so taakuba do afa nŋai a kɛkɛò hai nɛ gbugbã do ilu are ku ba a kpa inɛ ŋa iyi à waa too kpãa iyi í tɛ.

¹⁵ Amma taakuba nŋa ŋau si idɔ nŋai á lɔ, nɔ bioo nŋa ŋau aa cɛi.

¹⁶ Amani keeke iyi inɛ dee dee í nɛ, í tia amani bututui inɛ laalɔ ŋa.

¹⁷ Gbugbãi inɛ laalɔ ŋa á ce nfei, amma Aɔ̃ Lafɛ̃ɛi á maa sobi inɛ dee dee ŋa.

¹⁸ Aɔ̃ Lafɛ̃ɛ í mà kuwɛɛi inɛ dee dee ŋa nɔ tubu iyi í jilɛ nŋa á maa wɛɛi hee do ajɔ fei.

¹⁹ A kaa wa si anyɔ waati iyi wahala á to wa, nɔ waati iyi ari nla nla á naa aa maa jɛi bɛi à bi.

²⁰ Amma ilu inɔ kukã ŋa aa ce nfei, mbɛɛi Aɔ̃ Lafɛ̃ɛ ŋa aa lɔi bɛi fɔfɔ kusĩa. Aa lɔi bɛi cua.

²¹ Ilu inɔ kukã í ya kãayei nɔ ci ya sindo, amma inɛ dee dee í nɛ araare nɔ í ya muaa inɛi do inɔ akã.

²² Inɛ ŋa iyi Aɔ̃ Lafɛ̃ɛ í weea, aŋai aa nɛ ilɛu. Inɛ ŋa iyi í ceekpe, aa nya ŋai.

²³ Inɛ iyi isɛɛnɛɛ wa dɔ̃a Aɔ̃ Lafɛ̃ɛ si, Aɔ̃ Lafɛ̃ɛ í ya muaa gbugbãi.

²⁴ Bii í koosɛ, ci ya cuku domi Aɔ̃ Lafɛ̃ɛ wa muu si awɔɛ.

²⁵ Hai waati iyi ǹ wɛɛ awaasũ, hee wee nsɛi ǹ gbo, n kù yɛ bii Aɔ̃ Lafɛ̃ɛ í fũsi inɛ dee dee awɔ, n kù yɛ bii tɔkuɛ ŋa à koo à waa bara à bɛi à waa jɛ.

²⁶ Ajɔ fei, í ya wɛ̃a inɛi nɔ ku ce araareɛ. Nɔ tɔkuɛ ŋai à ya ba kuwee.

²⁷ Jɔ̀ laalɔ ku jĩɛ, i ya ce jiida, aa wa si ilɛu hee do ajɔ fei.

²⁸ Aɔ̃ Lafɛ̃ɛ í bi mii iyi í tɛ. Ci ya fũsi inɛɛ ŋa awɔ. Í ya maa mu ŋai hee do ajɔ fei. Amma woo ce laalɔ ŋa aa kui.

²⁹ Inɛ dee dee ŋai aa nɛ ilɛu. Aŋai aa wa si do ajɔ fei.

³⁰ Inɛ dee dee í ya fɔ idei do laakai, ide ntɔi í ya wa si gɛlɛɛ.

³¹ Ci ya koosɛ, domi í mà wooda ŋa iyi Aɔ̃ Lafɛ̃ɛɛ í jilɛ.

³² Ilu inɔ kukã í ya maa kɛɛma inɛ dee deei nɔ ku maa dɛ ku kpaɛ.

³³ Aɔ̃ Lafɛ̃ɛ ci ya fũa ilu inɔ kukãu inɛ dee deeu si awɔ, nɔ ci ya jɔ̀ a yɛ taaleɛ bi ku ce kiiti.

³⁴ Jɔ̀ kpãa ku cɔɛ ku wa si Aɔ̃ Lafɛ̃ɛ, nɔ i maa too kpãaɛ. Á soɛ lele nɔ awɔi aa nɛ ilɛu. Nɔ aa yɛ nfe ku cei ilu inɔ kukã ŋau.

³⁵ Ǹ yɛ ilu inɔ kukã hai nɛ araare wa la bɛi jĩi tũtũ.

³⁶ Waati iyi ǹ na ǹ too do bɛ kù wa bɛ má. Ǹ dɛdɛɛ amma n kù yɔɔ.

³⁷ Cɔ inɛ iyi í jɛ inɛ dee dee nɔ idɔɛ í má, kuwɛɛɛ á maa bɔ do wajui.

³⁸ Amma woo kɔ̀ ide ŋa, Aɔ̃ Lafɛ̃ɛ á ce nfe nŋai, nɔ a kaa nɛ ala.

³⁹ Aɔ̃ Lafɛ̃ɛi wa faaba inɛ dee dee ŋa. Nŋui í ya singa ŋa si waatii wahala.

⁴⁰ Aɔ̃ Lafɛ̃ɛ wa sobi ŋa nɔ wa nya ŋa hai si awɔi ilu inɔ kukã ŋa, wa faaba ŋai si na iyi í jɔ̀ bi titɛɛi à wa.