Iri ku kɔ̃ 36 - Bibeli do fee

Aɔ̃ Lafɛ̃ɛ, bi tɛɛi icui kuwɛɛ í wa

¹ Iriu ihɛ̃ ti inɛ ngboi woo kɔ̃ iri ŋai do Davidi woo ce icɛi Aɔ̃ Lafɛ̃ɛ.

² Ide ku kɔ̀i ilu inɔ kukã í ya wai hee si lɛlɛi idɔɛ. Si lasabuɛ í ya nii amanɛ kù nɛ ku maa ce njoi Ilaaɔ̃.

³ Faauɛ í ya jɔ̀ ci ya jɛsi kuraraɛ hee ku jɛa si taale ku nɛ si inɔ kufɔ nla nla.

⁴ Idei zamba do iboi í ya wa si gɛlɛɛ. Ci ya dɛdɛ iyi í jɛ jiida ku mà.

⁵ Bii wa sũ, laalɔi í ya maa lasabu si. Kpãa iyi kù sĩai í ya maa too nɔ ci ya fũsi laalɔ ku ce awɔ.

⁶ Aɔ̃ Lafɛ̃ɛ, jiida ku jɛɛ í bɔi hee lelei Aɔ̃, kubiɛ í bɔi hee si kudũi ijĩ.

⁷ Dee dee ku jɛɛ í gbokai bɛi iri kuta nla ŋa. Lasabuɛ ŋa à jĩisai bɛi ido nla. Aɔ̃ Lafɛ̃ɛ, awɔi ì ya faaba amanɛ do mɛɛmu ŋa fei.

⁸ Ilaaɔ̃, jiida ku jɛɛ í nɛ bɛɛrɛ. Do ikpa nlaɛi í ya bii amanɛ ŋa bɛi ikpai yɛi.

⁹ Si kpasɛ̃ɛ, ì ya mu nŋa ijɛ jiida nkpɔ nkpɔ. Ì ya jɔ̀ a ba jiida ku jɛɛ iyi í yɛ bɛi inyii ido a maa mɔ.

¹⁰ Awɔi ì jɛ icui kuwɛɛ. Inya kumáɛi í ya maa má nwa inya si kuwɛɛ nwa.

¹¹ Jɔ̀ jiida ku jɛɛ ku tosi inɛ ŋa iyi à màɛ. Jɔ̀ i nyisi inɛ ŋa iyi idɔ nŋa í má dee dee ku jɛɛ.

¹² Maà jɔ̀ ilu faau ku nɛ ku bam, nɔ i maà jɔ̀ ilu inɔ kukã ŋa a jɔ̀ n sa.

¹³ Woo ce laalɔ ŋa à cuku nɔ a kù yɔkɔ a kù dede má.