Iri ku kɔ̃ 34 - Bibeli do fee

Aɔ̃ Lafɛ̃ɛ í nyam hai si zigiidam ŋa fei

¹ Iriu ihɛ̃ ti Davidii. Davidi í sinda araɛ bɛi sũmu si wajui ilaalu Abimelɛki. Si anyiɛ Abimelɛki í leleɛ, nɔ í nɛ.

² An maa n saabu Aɔ̃ Lafɛ̃ɛi waati kãma fei. Waati kãma fei, an maa n cũui.

³ Aɔ̃ Lafɛ̃ɛi í jɔ̀ ǹ nɛ ara ku fũ. Iŋɛ ilu araare ŋa i de itĩ i gbɔ idem ŋa nɔ i wɛɛò inɔ didɔ̃.

⁴ I bam Aɔ̃ Lafɛ̃ɛ ku na amboe ŋa. Ka na iriɛ bɛɛrɛ ajɔ.

⁵ Ǹ kpe Aɔ̃ Lafɛ̃ɛ nɔ í jɛɛm. Í nyam hai si zigiidam ŋa fei.

⁶ Inɛ iyi wa cɔ Aɔ̃ Lafɛ̃ɛ í ya maa nɛ inɔ didɔ̃i. Ci ya yɛ anyɔ.

⁷ Waati iyi hai nɛ gbugbã gɔ í dɔ̃ anu si Aɔ̃ Lafɛ̃ɛ fei, í ya gbɔai nɔ í ya faabaɛi hai si bitandiɛ ŋa.

⁸ Amalekai Aɔ̃ Lafɛ̃ɛ í ya maa degbe inɛ ŋa iyi à waa jirimaɛ ŋai nɔ ku maa nya ŋa hai si mbiisi.

⁹ I ce laakai i cɔ ŋa nɔ i yɛ bɛi jiida ku jɛɛ í la í to. Inɛ iyi í ce bi ku manjiɛ bi Aɔ̃ Lafɛ̃ɛ ilu inɔ didɔ̃i.

¹⁰ Iŋɛ iyi ì jɛ inɛi Aɔ̃ Lafɛ̃ɛ ŋa, i jirimaɛ ŋa domi nkãma ci ya gaizia bi inɛ ŋa iyi à waa jirimaɛ.

¹¹ Ilu gbugbã ŋa à ya kua mii ŋa nɔ ari ku kpa ŋa. Amma inɛ ŋa iyi à mà bɛɛrɛi Aɔ̃ Lafɛ̃ɛ, a ci ya kua mii jiida kãma.

¹² Iŋɛ amam ŋa, i naa wa i na i gbɔ idem ŋa. An kɔ ŋɛ si bɛi aa jirima Aɔ̃ Lafɛ̃ɛ ŋa.

¹³ Bii í jɛ inɛ gɔ wa bi hundeɛ ku sɔ̀, nɔ kuwɛɛɛ ku dɔ̃,

¹⁴ lafɛ̃ɛ ku kãmia amɛ̀ɛ nɔ ku nɔ gɛlɛɛ si ide nfe nfe.

¹⁵ Lafɛ̃ɛ ku ya maa ce jiida, ku jɔ̀ laalɔ ku jĩiɛ, nɔ ku ya maa dɛdɛ laakai ku sũ.

¹⁶ Ijui Aɔ̃ Lafɛ̃ɛ í ya wa si inɛ dee dee ŋai, nɔ bii à waa dɔ̃ anu í ya gbɔi.

¹⁷ Aɔ̃ Lafɛ̃ɛ í ya jai do woo ce laalɔ ŋa, ku ba a gbɛjɛ ide nŋa si andunya.

¹⁸ Aɔ̃ Lafɛ̃ɛ í ya gbɔ anu ku dɔ̃i inɛ dee dee ŋa. Nɔ ku nya ŋa hai si wahala baa yooma fei.

¹⁹ Aɔ̃ Lafɛ̃ɛ í ya wa kɔkɔi ilu inɔ kufɔ ŋa, í ya faaba inɛ ŋa iyi a kù nɛ kpãa ku cɔ ŋa.

²⁰ Laalɔ nkpɔ nkpɔi í ya ba inɛ dee dee amma Aɔ̃ Lafɛ̃ɛi í ya nyaa hai fei ndɛɛ.

²¹ Í ya maa muui na mba kũkũi araɛ baa akã ku maà lɛgɛ.

²² Laalɔ ku ce í ya kpa inɛ laalɔi, nɔ inɛ ŋa iyi à cé inɛ dee dee, aa sã nŋa gbesei laalɔ nŋai.

²³ Aɔ̃ Lafɛ̃ɛ í ya faaba woo ce icɛɛ ŋa nɔ inɛ ŋa iyi à wa bi titɛɛ fei a kaa yɛ taale nŋa.