Iri ku kɔ̃ 33 - Bibeli do fee

Ka saabu Ilaaɔ̃ woo takau do woo faabau

¹ Iŋɛ inɛ dee dee ŋa, i dɔ̃ anu do inɔ didɔ̃ ŋa na irii Aɔ̃ Lafɛ̃ɛ. Iŋɛ inɛ kumá ŋa, i cũu ŋa domi bɛɛbɛi í sĩa i ce ŋa.

² I cũu do mɔɔlɔ ŋa nɔ i saabuɛ do mɔɔlɔ ilu ikũ mɛɛwa.

³ I kɔ̃a iri titɔ̃ ŋa, i cãa jĩnɛi iri ku kɔ̃ ŋa i maa saabuɛò.

⁴ Idei Aɔ̃ Lafɛ̃ɛ fei ntɔi, nɔ mii iyi wa ce fei í ya cooi dee dee.

⁵ Iyi í jɛ dee dee do iyi í tɛi Aɔ̃ Lafɛ̃ɛ í ya bi. Jiida ku jɛi Aɔ̃ Lafɛ̃ɛ í kɔ̃ ilɛu fei.

⁶ Aɔ̃ Lafɛ̃ɛ í taka lelei Aɔ̃i do idei gɛlɛɛ. Nɔ do woodaɛi í takaò leleaɔ̃ ŋa mɔ fei.

⁷ Í jɔ̀ inyii ido nla ŋa à tɔtɔɔ inya akã. Nŋui wa gɛɛ inyii ido nla ŋa.

⁸ Iŋɛ inɛi andunya ŋa, i jirima Aɔ̃ Lafɛ̃ɛ ŋa, i yaya si wajuɛ.

⁹ Iyi í fɔ fei í ya cei, bii í ni ngɔgɔ ku ce í ya cei.

¹⁰ Aɔ̃ Lafɛ̃ɛi í ya kɛkɛ lasabu iyi inɛi ilɛ ŋa à waa ce nɔ í ya kpa irii icɛ nŋai mam mam.

¹¹ Lasabui Aɔ̃ Lafɛ̃ɛ ci ya kpaasi pai. Lasabu iyi í ce, í ya maa wɛɛ hee do ajɔ fei.

¹² Inɔ didɔ̃i í ya jɛ ti ilɛ iyi í nɛ Ilaaɔ̃ í jɛ Lafɛ̃ɛɛ. Ilu inɔ didɔ̃ ŋai dimi ŋa iyi Aɔ̃ Lafɛ̃ɛ í cica à jɛ titɛɛ.

¹³ Aɔ̃ Lafɛ̃ɛ wa cɔ amanɛ ŋa wa hai lele nɔ wa yɛ inɛ fei.

¹⁴ Wa cɔ inɛi andunya fei wa hai bi kuwaɛ wa.

¹⁵ Nŋui í jɔ̀ inɛ baa yooma fei í nɛ lasabu, nŋui wa cɔ mii iyi inɛ fei wa ce do laakai.

¹⁶ Si igũ, bii ilaalu gɔ í ba í fita si, kù jɛ na sooge nkpɔɛ ŋa. Nɔ bii woo ja igũ ilu wɔɔkɔ gɔ í ba í fita si, kù jɛ na gbugbãɛ.

¹⁷ Masa iyi naanɛɛ í wa si acĩɛ, kaa jɛ igũ. Do gbugbã nla nlai acĩu fei, kaa yɔkɔ ku faabaɛ.

¹⁸ Amma inɛ ŋa iyi à waa jirima Aɔ̃ Lafɛ̃ɛ nɔ naanɛ nŋa í wa si kubiɛ, aŋai í ya maa degbe.

¹⁹ Nŋui á nya hunde nŋa wa hai si iku, nɔ ku jɔ̀ a maa wɛɛ si waatii ari.

²⁰ Awa, Aɔ̃ Lafɛ̃ɛi à waa kaaba, nŋui á sobi wa nɔ nŋui á degbe wa bɛi tɛli.

²¹ Ntɔ ntɔ, à ya ka nɛ inɔ didɔ̃i na iriɛ domi si iri kumáɛui kaaba nwa fei í wa.

²² Aɔ̃ Lafɛ̃ɛ, jɔ̀ kubi nlaɛ ku wɛɛ do awa si bɛi kpãa ku cɔ nwa fei siɛi í wa.