Iri ku kɔ̃ 32 - Bibeli do fee

Ilu inɔ didɔ̃i inɛ iyi à ceɛ suuru

1 Iriu ihɛ̃ ti Davidii.

¹ Iriu ihɛ̃ ti Davidii. Ilu inɔ didɔ̃i inɛ iyi à kpa idei kuraraɛ. ilu inɔ didɔ̃i inɛ iyi à cea suurui dulum dɛɛ.

² Ilu inɔ didɔ̃i inɛ iyi Ilaaɔ̃ kù waa muu do dulum dɛɛ má. Ilu inɔ didɔ̃i inɛ iyi kù nɛ lasabui zamba si idɔɛ.

³ Waati iyi n kù jɛsi kuraram fei, ǹ ya n kua gbugbãi, nɔ n ya n maa n weeweai ajɔ fei.

⁴ Dasã do idũ fei awɔɛ í ya maa tɛm nii. Ǹ baa ǹ yɛ bɛi jĩi ndii sukui koko. Kusĩmi.

⁵ Ŋɔi ǹ jɔ̀ ì mà dulum dom nɔ n kù singaɛ kuraram, ǹ ni, an ce tuubai kuraram ŋa bi Aɔ̃ Lafɛ̃ɛ. Nɔ ì kpa kuraram ŋa do dulum dom ŋau. Kusĩmi.

⁶ Si bɛɛbɛ, inɛ dee dee ŋau fei à nɛ a tɔɔɛi si waati iyi í jɔ. Baa bii inyi nla wa bi ku jɛ ŋai aa fita si.

⁷ Awɔi ì jɛ bi ku manjim, awɔi ì ya degbem si waatii wahala, ì jɔ̀ inɛ ŋa iyi à waa dɔ̃ anu do inɔ didɔ̃ na faabam à kaakom. Kusĩmi.

⁸ Aɔ̃ Lafɛ̃ɛ, ì sɔ̃m ì ni aa kɔm nɔ aa nyisim kpãa iyi an too, aa muum bisi nɔ aa maa mum.

⁹ Ì ni n maà n jɔ̀ n jɛ hai nɛ lasabu bɛi acĩ walakɔ bɛi mulee. À ya da nŋa si arezem do gadai, ku ba a gɛɛ ŋa a maà to si inɛ.

¹⁰ Wahalai inɛ laalɔ í ya caai, amma inɛ iyi í dasi Aɔ̃ Lafɛ̃ɛ naanɛ jiida ku jɛɛi í ya kaakoɛ.

¹¹ Iŋɛ inɛ dee dee ŋa, i wɛɛò inɔ didɔ̃ ŋa. Iŋɛ iyi idɔ nŋɛ í má, i dɔ̃ anu do inɔ didɔ̃ ŋa na irii Aɔ̃ Lafɛ̃ɛ.