Iri ku kɔ̃ 29 - Bibeli do fee

Imui Aɔ̃ Lafɛ̃ɛ

1 Iriu ihɛ̃ ti Davidii.

¹ Iriu ihɛ̃ ti Davidii. Iŋɛ iyi ì wa lele ŋa, i saabu Aɔ̃ Lafɛ̃ɛ, i jɔ̀ i mà bɛɛrɛɛ do gbugbãɛ ŋa.

² I jɔ̀ i mà bɛɛrɛi irii Aɔ̃ Lafɛ̃ɛ ŋa. I sɛɛbata si wajuɛ ŋa waati iyi í jɔ̀ à yɛ kumáɛ.

³ À waa gbɔ imui Aɔ̃ Lafɛ̃ɛ si antaii inyi ŋa. Ilaaɔ̃ ilu amboe í jɔ̀ à waa gbɔ kulai ijĩ. Aɔ̃ Lafɛ̃ɛ í wa antaii inyi nla ŋa.

⁴ Imui Aɔ̃ Lafɛ̃ɛ wa ce iba do gbugbã. Imui Aɔ̃ Lafɛ̃ɛu í nɛ amboe.

⁵ Imui Aɔ̃ Lafɛ̃ɛ í cɛ jĩi ndii sɛɛdi ŋa, Aɔ̃ Lafɛ̃ɛi í cɛ jĩi ndii sɛɛdii Libãa ŋa.

⁶ Í jɔ̀ Libãa í fo wa dingaai bɛi ama kɛtɛ kombo saasaabɔ. Í jɔ̀ iri kutai Siriɔ̃ɔ í fo wa dingaai bɛi ifã saasaabɔ.

⁷ Imui Aɔ̃ Lafɛ̃ɛ í jɔ̀ ijĩ í ŋɔ í ce inya kumá ŋa.

⁸ Imuɛui í jɔ̀ gbaa wa yaya. Aɔ̃ Lafɛ̃ɛ í jɔ̀ gbaai Kadɛsi wa yaya.

⁹ Imui Aɔ̃ Lafɛ̃ɛu í jɔ̀ kulu ŋa à bí. Í cɛ jĩi nla ŋa si inɔ agbo ŋa. Nɔ si inɔ kpasɛ̃ɛ inɛ ŋa à waa ni, Aɔ̃ Lafɛ̃ɛ ilu amboei.

¹⁰ Aɔ̃ Lafɛ̃ɛ wa bubai si kitãi bommaɛ si waati iyi inyi nla í jɛ andunyau. Wa bubai bɛi ilaalu hee do ajɔ fei.

¹¹ Aɔ̃ Lafɛ̃ɛ ku mua inɛɛ ŋa gbugbã, ku wee nŋa nɔ ku mu nŋa laakai ku sũ.