Iri ku kɔ̃ 27 - Bibeli do fee

Bi Aɔ̃ Lafɛ̃ɛ, an wɛɛi do laakai ku sũ

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛi í jɛ inya kumám do woo faabam. Si yooi zigim á maa da má. Aɔ̃ Lafɛ̃ɛi í jɛ bi ku manjim. Njoi yooi an maa n ce má.

² Bii inɛ laalɔ ŋa à naa sim bɛi mɛɛmu kugaabu ŋa, aŋa iyi à jɛ mbɛɛm ŋa nɔ à waa dɛ laalɔ ku ceem nɔu, aŋai à ya koosɛ nɔ a cuku.

³ Bii mbɛɛ ŋa à faata sim wa, idɔm ci ya dede. Nɔ bii à dede igũ, ǹ ya n nɛ naanɛi dim dim.

⁴ Mii akãi ǹ wa n tɔɔ Aɔ̃ Lafɛ̃ɛ, nɔ nŋui wa mum jiida jiida. Nŋui í jɛ n maa n wa inɔ kpasɛ̃ɛ si kuwɛɛm fei n maa n cɔ jiida ku jɛɛ, nɔ n maa n tɔɔɛ.

⁵ Ntɔ ntɔ, waati iyi wahala á naa sim, nŋui á jɔ̀ n ba bi ku manji bi tɛɛ, nɔ ku singam si kpasɛ̃ɛ. Nŋui á gũum lele si kuta gɔ.

⁶ Nsɛi, si antaii mbɛɛ ŋa iyi à kaakom ŋaui ǹ wa. Nɔ si inɔ kpasɛ̃ɛui an ce kuweei saabu ŋa nɔ n kɔ̃ iri n maa n na iriɛ bɛɛrɛ.

⁷ Aɔ̃ Lafɛ̃ɛ, waati iyi ǹ wa n kpeɛ, gbɔ imum. Ceem didɔ̃ nɔ i jɛɛm.

⁸ Aɔ̃ Lafɛ̃ɛ, idɔm í ya sɔ̃m ideɛ ku maa ni, i sinda wa bi tom ŋa. Nɔ ǹ sinda wa bi titɛɛ.

⁹ Maà toom anyi, maà kɔ̀si amu woo ce icɛɛ do idɔɔkɔ̃. Awɔi ì jɛ woo faabam, maà jɔ̀m, maà fũsim awɔ, awɔ iyi ì jɛ Ilaaɔ̃ woo faabam.

¹⁰ Baa bii iyeò baam ŋa à nyɔm, awɔ Aɔ̃ Lafɛ̃ɛi aa gbam.

¹¹ Aɔ̃ Lafɛ̃ɛ, nyisim kpãaɛ. Jɔ̀ n maa n nɛ si kpãa ku munga anuɛ na irii mbɛɛm ŋa iyi à waa kɛɛmam.

¹² Maà jɔ̀ mbɛɛm ŋa à ceem bɛi à bi, domi woo jɛ sɛɛda ibo ŋa à dede à waa mam ide à waa bi a taam gbugbã.

¹³ Ǹ nɛ naanɛ kãm kãm iyi an yɛ jiida ku jɛi Aɔ̃ Lafɛ̃ɛ si kuwɛɛm.

¹⁴ Jɔ̀ kpãa ku cɔɛ ku wa si Aɔ̃ Lafɛ̃ɛ. Leekĩ dim dim do nŋu, dasi wɔɔkɔ. Jɔ̀ kpãa ku cɔɛ ku wa si Aɔ̃ Lafɛ̃ɛ.