Iri ku kɔ̃ 25 - Bibeli do fee

Jɔ̀ n mà idɔɔbiɛ nɔ i ceem suurui kuraram ŋa

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, ikpa bi tɛɛi ǹ sinda wa.

² Aɔ̃ Lafɛ̃ɛm, awɔi ǹ wa n naanɛ, maà jɔ̀ n yɛ anyɔ. Maà jɔ̀ mbɛɛm ŋa a nɛ inɔ didɔ̃ sim.

³ Inɛ ŋa iyi à dasiɛ naanɛ fei a kaa yɛ anyɔ, amma anyɔi á jɛ ti inɛ ŋa iyi à jɛ woo zamba ŋa.

⁴ Aɔ̃ Lafɛ̃ɛ, jɔ̀ n mà kpãaɛ ŋa, nɔ i kɔm si bɛi ì bi n maa n jɛ kuwɛɛm.

⁵ Jɔ̀ n maa n nɛ si ntɔɛ ajɔ fei nɔ i ya maa kɔm, domi awɔi ì jɛ Aɔ̃ Lafɛ̃ɛ woo faabam. Siɛi kpãa ku cɔm í ya wa ajɔ fei.

⁶ Aɔ̃ Lafɛ̃ɛ, ye gigii araareɛ ŋa do jiida ku jɛɛ, domi hai ku kpɛi à wɛɛ.

⁷ Aɔ̃ Lafɛ̃ɛ, maà maa ye gigii dulum dom ŋa walakɔ ide ku kɔ̀m ŋa iyi ǹ ce hai awaasũm. Ye gigim si jiida ku jɛɛ na didɔ̃ɛ.

⁸ Aɔ̃ Lafɛ̃ɛ í jɛ jiida nɔ í tɛ na ŋɔi í jɔ̀ í ya nyisi ilu dulum ŋa kpãa.

⁹ Í ya jɔ̀ inɛ ŋa iyi à kaye ara nŋa, a maa nɛ si dee dee ku jɛ, nɔ inɛ ŋa iyi à kaye ara nŋa, í ya kɔ ŋa si kpãaɛ.

¹⁰ Kpãai Aɔ̃ Lafɛ̃ɛ ŋau fei à jɛ dee dee nɔ à jɛ ntɔ bi inɛ ŋa iyi à waa jirima akabuuɛ do ideɛ ŋa.

¹¹ Aɔ̃ Lafɛ̃ɛ, kuraram í la, amma na saabui iriɛ, aa kpaa.

¹² Inɛ iyi í mà bɛɛrɛi Aɔ̃ Lafɛ̃ɛ, Aɔ̃ Lafɛ̃ɛ í ya nyisiɛ kpãa iyi á tooi.

¹³ Lafɛ̃ɛ á maa wɛɛi si laakai ku sũ, nɔ tɔkuɛ ŋai aa nɛ ilɛu.

¹⁴ Inɛ ŋa iyi à mà bɛɛrɛi Aɔ̃ Lafɛ̃ɛ, aŋai í ya maa kɔ nɔ aŋai í ya jɔ̀ a mà asiiɛ. Í ya ce bɛɛbɛi ku ba ku jɔ̀ a mà akabuuɛu.

¹⁵ Ijum í ya maa kãsi Aɔ̃ Lafɛ̃ɛi, domi nŋui á nya kutɛm hai si cɛkũm.

¹⁶ Cɔm, nɔ i ce araarem domi amu akãi nɔ à waa taam gbugbã.

¹⁷ Inɔ kufɔi wa kɔ̃ si idɔm, nyam hai si inɔ kufɔm.

¹⁸ Cɔ wahalam do gbugbã iyi à waa taam nɔ i ceem suurui dulum dom ŋa.

¹⁹ Cɔ zaka bɛi mbɛɛm ŋa à kpɔ à to, do bɛi à cém hee í caa.

²⁰ Mu kuwɛɛm nɔ i faabam hai si awɔ nŋa na mba anyɔ ku maà biim waati iyi ǹ wa n manji bi titɛɛ.

²¹ Jɔ̀ dee dee ku jɛ do ntɔ a biim domi siɛi kpãa ku cɔm í wa.

²² Aɔ̃ Lafɛ̃ɛ, nya inɛi Izirɛli ŋa hai si wahala nŋa ŋa.