Iri ku kɔ̃ 24 - Bibeli do fee

Aɔ̃ Lafɛ̃ɛ í lɔ wa si kpasɛ̃ɛ

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛi í nɛ ilɛ do mii iyi í wa si fei, nŋui í nɛ andunya do inɛ ŋa iyi à wa si fei.

² Aɔ̃ Lafɛ̃ɛi í jilɛ icui ilɛ hai si lɛlɛi tenku ŋa wa nɔ í jɔ̀ í nɛ gbugbã si ido nla ŋa.

³ Yooi á yɔkɔ ku gũ iri kutai Aɔ̃ Lafɛ̃ɛ, yooi á yɔkɔ ku bɔ hee si kpasɛ̃ kumáɛ koo leekĩ.

⁴ Í gbe inɛ iyi awɔɛ kù ce laalɔ nɔ idɔɛ í má, inɛ iyi ci ya sɔ ibo nɔ ci ya ce kugbasi ku zambaò inɛ.

⁵ Lafɛ̃ɛ á ba kuweei hai bi Aɔ̃ Lafɛ̃ɛɛ do dee dee ku jɛi Aɔ̃ Lafɛ̃ɛ woo faabaɛ.

⁶ Inɛ ŋa iyi à waa dɛdɛ Aɔ̃ Lafɛ̃ɛ do ntɔ, aŋai à jɛ inɛ ŋa iyi à sinda do ikpa bi Aɔ̃ Lafɛ̃ɛi Zakɔbu do ntɔ. Kusĩmi.

⁷ Iŋɛ gambo ŋa, i cĩ ŋa. Iŋɛ gamboi tako ŋau i cĩ ŋa, na mba ilaalu ilu bɛɛrɛu ku lɔ.

⁸ Yooi í jɛ ilaalu ilu bɛɛrɛ. Aɔ̃ Lafɛ̃ɛ ilu gbugbãui, Aɔ̃ Lafɛ̃ɛ iyi í jɛ igũui.

⁹ Iŋɛ gambo ŋa, i cĩ ŋa. Iŋɛ gamboi tako ŋau i cĩ ŋa, na mba ilaalu ilu bɛɛrɛu ku lɔ.

¹⁰ Yooi í jɛ ilaalu ilu bɛɛrɛ, Aɔ̃ Lafɛ̃ɛi lele do ilɛui. Nŋui í jɛ ilaalu ilu bɛɛrɛu. Kusĩmi.