Iri ku kɔ̃ 22 - Bibeli do fee

Ilaaɔ̃, na mii í ce ì fũsim awɔ

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu iyi wa fɔ idei kului amɛɛjuumá.

² Ilaaɔ̃ Lafɛ̃ɛm, Ilaaɔ̃ Lafɛ̃ɛm, na mii í ce ì fũsim awɔ, na mii í ce ì jĩim. Na mii í ce ǹ kpata siɛ, nɔ i kù faabam.

³ Ilaaɔ̃, ǹ kpeɛ dasã nɔ i kù jɛɛm, nɔ idũ má ǹ kpeɛ n kù coko.

⁴ Do nŋu fei, awɔi ì jɛ Inɛ Kumá, awɔi ì jɛ ilaalu nwa nɔ inɛi Izirɛli ŋa à ya maa cĩɛi waati kãma fei.

⁵ Awɔi bala nwa ŋa à dasi naanɛ. À dasiɛ naanɛ nɔ ì faaba ŋa.

⁶ À dɔ̃ siɛ anu nɔ ì nya ŋa. Awɔi à dasi naanɛ nɔ anyɔ kù mu ŋa.

⁷ Amu ǹ jɛ amanɛ mbɛ má wo. Aawo, ǹ yɛi bɛi kòkòo. Inɛ ŋa à waa yaakom, nɔ à dondam.

⁸ Inɛ ŋa iyi à yɛm fei, à ya maa nyaanyim nii, à maa ce sim gɛlɛ sukiki nɔ à maa gbugbã iri.

⁹ Inɛ ŋau à ya maa ni si gãmɛm, í so araɛ í daa Aɔ̃ Lafɛ̃ɛ si awɔ. Bɛirei í ce kù faabaɛ. Bii í buui, bɛirei í ce kù nyaa.

¹⁰ Ntɔ ntɔ, Aɔ̃ Lafɛ̃ɛ, ì nyam wai hai si inɔi iyem. Ì jɔ̀ ǹ nɛ baani iyi ǹ wa n mɔmɔ amɔi iyem.

¹¹ Awɔi ì waa mum hai à bím gbakã. Hai ǹ wa inɔi iyem, awɔi ì jɛ Ilaaɔ̃ Lafɛ̃ɛm.

¹² Maà jĩim waati iyi wahala í maai sim wa, waati iyi inɛ kãma kaa yɔkɔ ku sobim.

¹³ Mbɛɛm ŋa à kpɔi nɔ à kaakom bɛi kɛtɛ kombo ŋa. À kaakom nii bɛi kɛtɛ kombo ku nɛ gbugbãi Basãa ŋa.

¹⁴ Bɛi muusu nla kugaabu iyi wa dɔ̃ anu wa dɛ sɔnda, bɛɛbɛi à la gɛlɛ nŋa sim.

¹⁵ Gbugbãm wa tãi bɛi inyi iyi wa cã. Kũkũi aram ŋa fei à kua gbugbã. Idɔm í yɛi bɛi akai nyikɔ̃ iyi wa yɔ si inɔm.

¹⁶ Gbangɔlɔm í gbɛ bɛi amà. Amɛ̀m í mási anu lelem. Ì jɔ̀ ǹ ku ǹ baa bɛi ilùlù.

¹⁷ Inɛ laalɔ nkpɔ gɔ ŋa à kaakom. À waa dɔ̃ anu bɛi aja ŋa nɔ à mu kutɛm do awɔm ŋa fei.

¹⁸ Ǹ gbɛ hee kũkũi aram ŋa fei í fita, nɔ inɛ ŋa à ya kãsim ijui a maa cɔm.

¹⁹ À kpɛ̃ jĩnɛm ŋa aŋa duusɔ̃ɔ, nɔ à ta si ibɔ nlam kpasa.

²⁰ Awɔ Aɔ̃ Lafɛ̃ɛm, maà jĩim, awɔ iyi ì jɛ gbugbãm, naa i faabam ńya ńya.

²¹ Nya hundem hai si anui taakuba. Nya kuwɛɛm hai si aja ku nɛ gbugbã ŋau.

²² Ǹ ni, faabam hai si gɛlɛi muusu nla, do hai si ngoi ifã ŋa, nɔ ì jɛɛm.

²³ An sɔ̃ inɛm ŋa ideɛ, an saabuɛ bii inɛ ŋa à tɔtɔɔ.

²⁴ Iŋɛ iyi ì waa jirima Aɔ̃ Lafɛ̃ɛ, i cũu ŋa. Iŋɛ tɔkui Zakɔbu ŋa fei, i naa bɛɛrɛ ŋa. Iŋɛ tɔkui Izirɛli ŋa, i yaya si wajuɛ ŋa.

²⁵ Ci ya donda ilu are, nɔ ci ya sinda ku toa anyi. Amma í ya gbɔa waati iyi í dɔ̃ anu siɛ.

²⁶ Aɔ̃ Lafɛ̃ɛ, awɔi ì jɔ̀ ǹ yɔkɔ ǹ wa n cĩɛ tengi bii inɛ ŋa à tɔtɔɔ, an kɔ̃ kuwã ŋa iyi ǹ ceɛ si wajui inɛ ŋa iyi à mà bɛɛrɛɛ.

²⁷ Ilu are ŋa aa ba a jɛ hee a yo. Inɛ ŋa iyi à waa dɛdɛ Aɔ̃ Lafɛ̃ɛ, aa maa wɛɛi do ajɔ fei nɔ a maa saabuɛ.

²⁸ Inɛ ŋa iyi à wa hee kɔɔi andunya ŋa fei aa ye gigii Aɔ̃ Lafɛ̃ɛ nɔ a sinda siɛ. Nɔ bɛɛbɛ mɔi dimi fei á na ku sɛɛbata si wajuɛ.

²⁹ Aɔ̃ Lafɛ̃ɛ, nŋui í nɛ bomma nɔ nŋui wa jɛ inɛ ngboi dimi fei.

³⁰ Ilu gbugbãi andunya ŋa fei aa koo a jɛi nɔ a sɛɛbata si wajuɛ. Aŋa iyi a kù yɔkɔ a kù gɛɛ hunde nŋau, aa ku nɔ aa sɛɛbatai si wajuɛ.

³¹ Tɔku nŋa ŋa aa ceaa icɛ nɔ aa sɔ̃ dimi iyi á na ku naa idei Aɔ̃ Lafɛ̃ɛ.

³² Aa naa a fɔ mii iyi Aɔ̃ Lafɛ̃ɛ í ce si dee dee ku jɛɛ bi inɛ ŋa iyi aa na a bí.