Iri ku kɔ̃ 21 - Bibeli do fee

Ilaalu á yɔkɔ ku kaaba Aɔ̃ Lafɛ̃ɛ

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Aɔ̃ Lafɛ̃ɛ, ilaaluu í ya nɛ inɔ didɔ̃i na gbugbãɛ, inɔ didɔ̃ nla nlai í ya wɛɛò na faabaɛ.

³ Mii iyi idɔɛ í bii ì naa, nɔ i kù kɔ̀ɔ mii iyi gɛlɛɛ í tɔɔɛ. Kusĩmi.

⁴ Wee ì naa bi tɛɛ do kuwee jiida ŋa, nɔ ì daa si fulai wura alala gɔ.

⁵ Í tɔɔɛ kuwɛɛ nɔ ì muaa. Ì mua hunde sisɔ hai nɛ kɔɔ.

⁶ Amboeɛ í la si na iyi í jɔ̀ ì faabaɛ. Ì jɔ̀ í nɛ yiiko do bɛɛrɛ nla nla.

⁷ Kuwee jiidaɛ í ya maa wɛɛi do nŋu ajɔ fei. Ì ya maa wɛɛi do nŋu ajɔ fei nɔ ì ya maa muaa inɔ didɔ̃i.

⁸ Aɔ̃ Lafɛ̃ɛ iyi í wa hee lele, awɔi ilaalu wa kaaba, nɔ do jiida ku jɛɛ, i kaa jɔ̀ ku koosɛ.

⁹ Aɔ̃ Lafɛ̃ɛ, aa to mbɛɛɛ ŋau awɔ, nɔ awɔ njɛɛ kaa gaizia inɛ ŋa iyi à céɛ ŋa.

¹⁰ Aɔ̃ Lafɛ̃ɛ, aa gbãa si ŋai bɛi ina nla ajɔ iyi aa faata wa. Aɔ̃ Lafɛ̃ɛ, aa kpa ŋai si idɔɔkɔ̃ɛ nɔ ina ku ce nfe nŋa mam mam.

¹¹ Aa kpa dimi nŋai si ilɛu ihɛ̃, nɔ aa kpa irii tɔku nŋa ŋai si andunya.

¹² À dɛdɛ a ceɛ laalɔ, nɔ à ce lasabu laalɔ si gãmɛɛ, amma a kaa yɔkɔ a ceɛ nkãma.

¹³ Aa jɔ̀ a sinda a to anyii nɔ do afaɛi aa ta ŋau.

¹⁴ Aɔ̃ Lafɛ̃ɛ, dede i nyisi kulaɛ do gbugbãɛ. Awa aa ka kɔ̃ irii ka sisi gbugbãɛ.