Iri ku kɔ̃ 20 - Bibeli do fee

Kutɔɔ iyi aa cea ilaalu

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Aɔ̃ Lafɛ̃ɛ ku gbɔ kutɔɔ iyi ì ce si waatii inɔ kufɔ. Ilaaɔ̃ Lafɛ̃ɛi Zakɔbu ku maa degbeɛ.

³ Aɔ̃ Lafɛ̃ɛ í wa si kpasɛ̃ kumáɛ, nɔ hai Siɔ̃ɔ bɛ ku maa muuɛ gbugbã, nɔ ku maa sobiɛ.

⁴ Aɔ̃ Lafɛ̃ɛ ku maa ye gigii amuaɛ ŋa fei, nɔ ku gba kuweeɛ ŋa. Kusĩmi.

⁵ Aɔ̃ Lafɛ̃ɛ ku muuɛ mii iyi ì bi si idɔɛ, nɔ ku jɔ̀ mii iyi ì dasi idɔ i ce fei ku kɔ̃.

⁶ Aa ka dɔ̃ anu do inɔ didɔ̃ na faabaɛ. Aa ka wu tuuta lelei do irii Ilaaɔ̃ Lafɛ̃ɛ nwa. Aɔ̃ Lafɛ̃ɛi á jɔ̀ mii iyi ì waa tɔɔɛ fei ku kɔ̃.

⁷ Nsɛi ǹ mà iyi Aɔ̃ Lafɛ̃ɛi wa faaba ilaalu iyi í cicau. Nŋui í ya gbɔ kutɔɔɛ wa hai lele bi kuwaɛu, nɔ í ya jɛ igũi do saabui gbugbã nlaɛ.

⁸ Inɛ gɔ ŋa, sarɛtii igũ nŋa ŋa do acĩ nŋa ŋai à ya maa kaaba, amma awa iriɛi aa ka kpe.

⁹ Inɛ ŋau à kua gbugbã nɔ à cuku, amma awa à waa leekĩ dim dim.

¹⁰ Aɔ̃ Lafɛ̃ɛ, faaba ilaaluu, nɔ waati iyi awa mɔ à tɔɔɛ sobi i yɔkɔ i jɛ nwa.