Iri ku kɔ̃ 19 - Bibeli do fee

Amboei Ilaaɔ̃ si andunya, woodai Aɔ̃ Lafɛ̃ɛ

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Lelei Aɔ̃ wa sisi amboei Ilaaɔ̃, nɔ mii ŋa iyi í taka iyi à wa lelei Aɔ̃ fei à waa sisi icɛi awɔɛ ŋa.

³ Ajɔ iyi à wa sii á sisia ajɔ mmu amboe iyi Ilaaɔ̃ í nɛ. Nɔ idũ iyi à wa sii á sisia idũ mmu amboe iyi Ilaaɔ̃ í nɛ.

⁴ Kù jɛ si faaji gɔ kù nɔ kù jɛ si ide ku fɔ gɔ, a kù nɔ a kù waa gbɔ imu nŋa.

⁵ Do nŋu fei, à waa gbɔ baau nŋai si ilɛu fei, à waa gbɔ ide ku fɔ nŋai hee kɔɔi andunya. Ilaaɔ̃ í gũa inunu ilei acɔ.

⁶ Daakɔ, inunu í ya fitai bɛi mɔkɔ titɔ̃. Bii wa nɛ, í ya nɛ inɔ didɔ̃i bɛi inɛ iyi í nya iri si kusɛi.

⁷ Í ya dedei do cingaa akãi lelei Aɔ̃ nɔ í ya koo lɔi do cingaa ihɔ̃. Inya gbãaɛ ci ya dale nkãma.

⁸ Idei Aɔ̃ Lafɛ̃ɛ í kɔ̃i mam mam, nɔ í ya muaa inɛ kuwɛɛ. Sɛɛdaɛi í jɛ ntɔ, nɔ í ya muaa hai mà ŋa bisi.

⁹ Woodaɛ ŋai à jɛ dee dee, à ya mua inɛ inɔ didɔ̃. Woodaɛ ŋau à nɛ inya kumá, à ya jɔ̀ ijui inɛ ku má.

¹⁰ Bɛɛrɛi Aɔ̃ Lafɛ̃ɛ ku mà mii jiidai, nɔ á maa wɛɛi do ajɔ fei. Asaiyai Aɔ̃ Lafɛ̃ɛ ŋau fei ntɔi nɔ à jɛ dee dee.

¹¹ Ideɛi í jɛ jiida í re wura alala, í dɔ̃ í re baa nyikɔ̃ iyi wa jò wa hai si fãfãɛ.

¹² Amu woo ce icɛɛ, ideɛ ŋau à waa fà laakaim. Nɔ bii ǹ wa n jirima woodaɛ, aranfãani nla nlai an ba.

¹³ Yooi á yɔkɔ ku mà kuraraɛ ŋa iyi í ce iyi kù jɛ si idɔɔbiɛ. Maà mum do taale si kurara iyi n kù mà.

¹⁴ Amu woo ce icɛɛ, jɔ̀ ilu faau ŋa a jĩim, maà jɔ̀ a kãmiam. Waati bɛɛbɛ, an jɛ inɛ dee dee iyi kù nɛ taale nla nla.

¹⁵ Aɔ̃ Lafɛ̃ɛ, jɔ̀ ide ku fɔm do lasabum fei ku ya dɔ̃ɛ si. Ntɔ ntɔ, awɔ akãi ì jɛ bi ku manjim nɔ awɔ akãi ì jɛ woo yám.