Iri ku kɔ̃ 18 - Bibeli do fee

Davidi í saabu Aɔ̃ Lafɛ̃ɛ si anyii igũ ku jɛ

¹ Iriu ihɛ̃ ti inɛ ngboi woo kɔ̃ iri ŋai do Davidi woo ce icɛi Aɔ̃ Lafɛ̃ɛ. Davidi í fɔ ideu ihɛ̃i waati iyi Aɔ̃ Lafɛ̃ɛ í nyaa hai si awɔi mbɛɛɛ ŋa fei do hai si awɔi Saulu.

² Aɔ̃ Lafɛ̃ɛ, ǹ biɛ, awɔi ì jɛ gbugbãm.

³ Awɔi ì jɛ kuta bii an manji nɔ awɔi ì jɛ inya ku nɛ gbugbãm. Awɔi ì jɛ Ilaaɔ̃ Lafɛ̃ɛm iyi í faabam. Awɔi ì jɛ kuta bii an manji, awɔi ì jɛ bɛi tɛlim, awɔi ì jɛ ngo iyi í faabam nɔ awɔi ì jɛ ile ku nɛ gbugbãm.

⁴ Ŋɔi ǹ dɔ̃ anu ǹ ni, saabui í jɛ ti Aɔ̃ Lafɛ̃ɛ domi bii ǹ tɔɔɛ faaba í ya nyam nii hai si awɔi mbɛɛm ŋa.

⁵ Iku í dĩm wa nɛɛm bɛi acãi inyi iyi í ya ce nfei inɛ nɔ wa da zigim.

⁶ Ǹ ce amɛɛ do bi kuwai iku ŋa tã. Iku í zambam bɛi yɛi iyi í dasi taa.

⁷ Si zigiidam, ǹ kpe Aɔ̃ Lafɛ̃ɛm, ǹ tɔɔɛ faaba. Hai lele bi kuwaɛ wa, í gbɔ imum. Anu ku dɔ̃i faaba iyi ǹ dɔ̃ si wajuɛu í lɔ si itĩɛ.

⁸ Ilɛ í yaya nɔ í sɛkɛɛ. Icui iri kuta ŋa à yaya. À yayai na idɔɔkɔ̃i Aɔ̃ Lafɛ̃ɛ iyi í dede.

⁹ Nɔ si idɔɔkɔ̃ɛu cua wa fita wa hai si imɔɛ ŋa, nɔ hai si gɛlɛɛ amɛi ina wa fita bɛi jĩi gɔ iyi í mu ina wa jo.

¹⁰ Aɔ̃ Lafɛ̃ɛi í jɔ̀ lele í baa ilɛ, nɔ í kita wa si antaii kudũi ijĩ nla gɔ.

¹¹ Aɔ̃ Lafɛ̃ɛ í gũ serubɛ̃ɛ gɔ nɔ wa fo. Í foi wa yaa si fufu.

¹² Í manjii si kudũi ijĩ iyi í ce ilu kuku nla nla. Nɔ kudũi ijĩ nlau í biiɛ.

¹³ Inya kumá í wa si wajuɛ, hai si inya kumáui kudũi ijĩ ŋau wa naa, do kutai ijĩ do ina nyɛnyɛ ŋa.

¹⁴ Aɔ̃ Lafɛ̃ɛ í jɔ̀ à gbɔ kulai ijĩ. Ilaaɔ̃ nŋu iyi í wa hee lele í jɔ̀ à gbɔ imuɛ. Nɔ kutai ijĩ do ina nyɛnyɛ à waa cuku wa.

¹⁵ Aɔ̃ Lafɛ̃ɛ í ta afaɛ ŋa nɔ í fangaa mbɛɛ ŋa. Í jɔ̀ kuŋɔi ijĩ í naa si ŋa, nɔ zigi nŋa í da.

¹⁶ Si idɔɔkɔ̃ɛ iyi í dede bɛi fufu nla, í jɔ̀ à yɛ lɛlɛi tenku ŋa nɔ à yɛ icui ilɛ.

¹⁷ Aɔ̃ Lafɛ̃ɛ í yɔ awɔɛ wa hai bɛ í mum, í nyam hai si wahala iyi wa milem.

¹⁸ Aɔ̃ Lafɛ̃ɛi í nyam hai si awɔi mbɛɛm ŋa iyi à gaabu, do hai si awɔi inɛ ŋa iyi à cém, aŋa iyi à rem do gbugbãu.

¹⁹ Inɛ ŋa à bɛɛgɛ si ajɔi wahalam a ba a kpam. Amma Aɔ̃ Lafɛ̃ɛ í sobim.

²⁰ Aɔ̃ Lafɛ̃ɛi í nyam, í jɔ̀ ǹ nɛ aram. Í nɛ kubim, na ŋɔi í jɔ̀ í nyam.

²¹ Aɔ̃ Lafɛ̃ɛ í ceem bɛɛbɛi si bɛi dee dee ku jɛm í to. nɔ í sãam ribai dee dee ku jɛm.

²² Ntɔ ntɔ, kpãai Aɔ̃ Lafɛ̃ɛ ǹ tooɛi. N kù na aram si laalɔ, hee ku jɔ̀ n jĩò Ilaaɔ̃ Lafɛ̃ɛm.

²³ Woodaɛ ŋa si wajum nii à ya wa, nɔ n ci ya n jĩò ideɛ.

²⁴ Ǹ jɛ inɛ dee dee bi tɛɛ, nɔ ǹ wa n mu aram ku ba n maà n na n ce kurara kãma.

²⁵ Ntɔ ntɔ, Aɔ̃ Lafɛ̃ɛ í ceem bɛɛbɛi si bɛi dee dee ku jɛm í to, nɔ í sãam ribai dee dee ku jɛm.

²⁶ Awɔ Aɔ̃ Lafɛ̃ɛ, ì ya nyisi dee dee ku jɛɛi bi inɛ iyi í jɛ dee dee. Nɔ inɛ iyi kù nɛ taale ì ya nyisiɛ taale hai nɛɛi.

²⁷ Inɛ kumá, ì ya nyisiɛ kumáɛi. Inɛ iyi í nɛ bisi laalɔ ì ya nyisiɛ bisii.

²⁸ Inɛ ŋa iyi à kaye ara nŋa ì ya so ŋa lelei, inɛ ŋa iyi à waa so ara nŋa lele ì ya kaye ŋai.

²⁹ Aɔ̃ Lafɛ̃ɛ, awɔi ì jɛ fitilam, awɔ Ilaaɔ̃ Lafɛ̃ɛm nii ì ya máam inya si ilu kuku.

³⁰ Aɔ̃ Lafɛ̃ɛm, do saabuɛi ǹ ya n yɔkɔ n lɛgɛ bindi, nɔ do saabuɛi ǹ yɔkɔ ǹ kãmia mbɛɛm ŋa.

³¹ Kpãai Aɔ̃ Lafɛ̃ɛ í má, nɔ ideɛ ŋa fei ntɔi. Nŋui í jɛ bɛi tɛlii inɛ ŋa iyi à naa à manji bi tɛɛ ŋau fei.

³² Ntɔ ntɔ, Aɔ̃ Lafɛ̃ɛi í jɛ Ilaaɔ̃. Ilaaɔ̃ mmu gɔ í wɛɛ mbɛ má? Nŋui í jɛ bɛi kuta bi ku manji. Kuta bi ku manji mmu gɔ í wɛɛ mbɛ má?

³³ Nŋui í ya muum gbugbã nɔ nŋui í ya jɔ̀ mii iyi ǹ wa ce fei ku nɛ dee dee.

³⁴ Nŋui í ya jɔ̀ kutɛm ku gbãa bɛi ti kulu, nɔ n maa n nɛ si geete ŋa do laakai ku sũ.

³⁵ Nŋui í ya kɔm si bɛi an ceò igũ nɔ í ya maa sobim si bioo ku wã.

³⁶ Awɔ Aɔ̃ Lafɛ̃ɛ, do gbugbãɛi ì ya maa mum. Ì ya biim nii bɛi tɛli, nɔ ì faabam. Bii ǹ kpeɛ ì ya jɛɛm nii. Awɔi ì ya muum gbugbã.

³⁷ Do saabuɛi isɛɛnɛm í ya gbãa nɔ n ci ya n koosɛ.

³⁸ Awɔi ì ya jɔ̀ n lele mbɛɛm ŋa n mu ŋa, nɔ n ci ya n sinda bii kù jɛ ǹ ce nfe nŋa.

³⁹ Ǹ ya n cafe ŋai n lesi ŋa kutɛ. Nɔ a ci ya yɔkɔ a dede.

⁴⁰ Awɔi ì ya muum gbugbã n ceò igũ n tɛɛsɛ mbɛɛm ŋa. Aŋa wee ǹ wa n leekĩ si antai nŋa.

⁴¹ Awɔi ì ya jɔ̀ mbɛɛm ŋa a saam, nɔ ì ya jɔ̀ n ce nfei inɛ ŋa iyi à cém.

⁴² À dɔ̃ anu, à waa tɔɔ faaba, amma inɛ gɔ kù faaba ŋa. À tɔɔ Aɔ̃ Lafɛ̃ɛ sobi, nɔ kù jɛ nŋa.

⁴³ An fɛ ŋai bɛi ilùlù iyi fufu wa nɛò. An tɛɛsɛ ŋai bɛi pɔkɔdɔi kpãa.

⁴⁴ Awɔi ì nyam hai si awɔi inɛ laalɔ ŋa. Awɔi ì cem inɛ ngboi dimi ŋa, inɛ ŋa iyi n kù mà iyi à waa sũum iri ilɛ.

⁴⁵ Bii ǹ fɔ ide gbakã, à ya jirimam nii. Isɛ mmu ŋa, à ya bi a maa dĩ ijum nii do ide didɔ̃ nŋa.

⁴⁶ Awɔi ì ya jɔ̀ a kua gbugbã. Awɔi ì ya jɔ̀ a fita hai si ile ku nɛ gbugbã nŋa à maa yaya.

⁴⁷ Aɔ̃ Lafɛ̃ɛ í wɛɛ. An saabuɛ, nŋu iyi í jɛ kuta bi ku manjim. Bɛɛrɛ ku jɛ titɛɛ, nŋu woo faabam.

⁴⁸ Aɔ̃ Lafɛ̃ɛ nŋui í ya sãam gbese nɔ nŋui í ya jɔ̀ dimi ŋa a sũum iri ilɛ.

⁴⁹ Aɔ̃ Lafɛ̃ɛ, awɔi ì ya nyam hai si awɔi mbɛɛm ŋa, awɔi ì ya jɔ̀ n jɛ ŋa igũ. Awɔi ì ya nyam hai si awɔi woo taa inɛ ŋa gbugbãu.

⁵⁰ Aɔ̃ Lafɛ̃ɛ, an sisi n maa n fɔ kulaɛi si inɔi dimi mmu ŋa nɔ n kɔ̃ iri n maa n na iriɛ bɛɛrɛ.

⁵¹ Aɔ̃ Lafɛ̃ɛ í cea ilaalu iyi í cicau mii nla nla. Nɔ á ya nyisi Davidi do tɔkuɛ ŋa jiida ku jɛɛ hee do ajɔ fei.