Iri ku kɔ̃ 16 - Bibeli do fee

Inɔ didɔ̃i inɛ iyi Aɔ̃ Lafɛ̃ɛ í nya hai si iku

1 Iriu ihɛ̃ ti Davidii.

¹ Iriu ihɛ̃ ti Davidii. Ilaaɔ̃, ǹ wa n tɔɔɛi i degbem, domi bi tɛɛi an manji.

² Ǹ sɔ̃ Aɔ̃ Lafɛ̃ɛ ǹ ni, awɔi ì jɛ Lafɛ̃ɛm. Ǹ ni awɔ akãi ì jɛ mii jiida iyi ǹ ba.

³ Si ilɛu ihɛ̃ inɛ ŋa à wɛɛ iyi à waa tɔɔ iwɛ̃ ŋa. Nɔ amu mɔ ǹ ya n nɛ si ŋa inɔ didɔ̃i wo.

⁴ Inɛ ŋa iyi à waa tɔɔ iwɛ̃ ŋau, aa ba wahala ntɔ ntɔ. Ajɔ kãma amu n kaa n cea iwɛ̃ ŋau kuweei njɛ má, nɔ n kaa n kpe baa iri nŋa si gɛlɛm má.

⁵ Aɔ̃ Lafɛ̃ɛ, awɔi ì jɛ ikpɛ̃m iyi ǹ nɛ n ba. Awɔi ì waa mu kuwɛɛm.

⁶ Ikpɛ̃ iyi ì nam nɔu í dɔ̃ɔm si. Ikpɛ̃u, ǹ nɛ si inɔ didɔ̃ ntɔ ntɔ.

⁷ Ǹ wa n saabu Aɔ̃ Lafɛ̃ɛ iyi wa nam ikɔ, nɔ baa idũ, lasabum í ya maa bam ide ku fɔi.

⁸ Aɔ̃ Lafɛ̃ɛi an maa n cɔ waati kãma fei. N kaa n kua gbugbã waati iyi í wa cingaam.

⁹ Na ŋɔi í jɔ̀ ǹ wɛɛò inɔ didɔ̃ nla nla nɔ ǹ wa n kɔ̃a iri ŋa. Ǹ wɛɛò laakai ku sũ ntɔ ntɔ.

¹⁰ Aɔ̃ Lafɛ̃ɛ, i kaa jɔ̀ hundem bi kuwai iku ŋa, i kaa jɔ̀ amu woo ce icɛɛ n sãmi si inɔ balɛ.

¹¹ Ì nyisim kpãa iyi wa bɔ si kuwɛɛ. Ǹ nɛ inɔ didɔ̃ nla nla si na iyi í jɔ̀ ì wɛɛ do amu. An maa n wɛɛ do inɔ didɔ̃ bi titɛɛ hee do ajɔ fei.