Iri ku kɔ̃ 149 - Bibeli do fee

Bɛɛrɛi inɛ dee dee ŋa

¹ I saabu Aɔ̃ Lafɛ̃ɛ ŋa. I kɔ̃a Aɔ̃ Lafɛ̃ɛ iri titɔ̃ ŋa. I kɔ̃ iri i cũu bii inɛɛ ŋa à tɔtɔɔ ŋa.

² Izirɛli, jɔ̀ i wɛɛò inɔ didɔ̃ na woo takaɛ. Iŋɛ inɛi Siɔ̃ɔ ŋa, i wɛɛò inɔ didɔ̃ ŋa na ilaalu nŋɛ.

³ A kɔ̃ iri a cũu a maa jojoò, nɔ a cã ama gãgã do mɔɔlɔ ŋa a maa naaò bɛɛrɛ.

⁴ Ntɔ ntɔ Aɔ̃ Lafɛ̃ɛ í ya nɛ inɔ didɔ̃i si inɛɛ ŋa. Í ya mà bɛɛrɛi inɛ ŋa iyi à kaye ara nŋai nɔ ku faaba ŋa.

⁵ Inɛ dee dee ŋa a ya maa jojo do inɔ didɔ̃, si na iyi í jɔ̀ Aɔ̃ Lafɛ̃ɛ í jɛ igũ na iri nŋa. Nɔ baa si antaii daayi nŋa, a ya maa dɔ̃ anu do inɔ didɔ̃.

⁶ Aɔ̃ Lafɛ̃ɛ ku saabu ku ya wa si gɛlɛ nŋa, nɔ taakuba ilu andɛ minji ku dɔ̃ anu gɔ ku wa si awɔ nŋa,

⁷ ku ba a sãò gbesei mii iyi dimi mmu ŋa à ce nŋa, nɔ a kpã ŋa iju.

⁸ Aa dĩ ilaalu nŋa ŋaui do sesee, nɔ a kpati inɛ ngbo nŋa ŋau do isɔ,

⁹ ku ba a kiiti ŋa bɛi à kɔɔu. Bɛɛrɛ nla nlai á jɛ ti inɛɛ ŋa. I saabu Aɔ̃ Lafɛ̃ɛ ŋa.