Iri ku kɔ̃ 148 - Bibeli do fee

I saabu Aɔ̃ Lafɛ̃ɛ lelei Aɔ̃ do si ilɛ ŋa

¹ I saabu Aɔ̃ Lafɛ̃ɛ ŋa. I saabu Aɔ̃ Lafɛ̃ɛ ŋa hai lelei Aɔ̃ wa. I saabuɛ si geete ŋa.

² I saabuɛ ŋa, iŋɛ amalekaɛ ŋa. I saabuɛ ŋa, iŋɛ soogeɛ ŋa.

³ Cukpa do inunu, i saabuɛ ŋa. Iŋɛ leleaɔ̃ ŋa fei, iŋɛ iyi ì ya maa má inya ŋa, i saabuɛ ŋa.

⁴ Iŋɛ inɛi lele ŋa, i saabuɛ ŋa. Iŋɛ inyi ŋa iyi ì wa lele ŋa, i saabuɛ ŋa.

⁵ Aŋa fei a saabu Aɔ̃ Lafɛ̃ɛ, domi í na wooda nɔ à sinti kuwɛɛ.

⁶ Í jilɛ ŋai a maa wɛɛ hee do ajɔ fei. Nɔ í jilɛ nŋa wooda iyi kaa kpaasi.

⁷ I saabu Aɔ̃ Lafɛ̃ɛ ŋa hai ilɛ, iŋɛ inyi nla ŋa, do mɛɛmu nlai inɔ tenku ŋa.

⁸ Ina do kutai ijĩ do nɛɛzu, do bukɔɔ do fufu nla, iŋɛ iyi ì waa jirima ideɛ ŋa, i saabuɛ ŋa.

⁹ Iŋɛ iri kuta ŋa do geete ŋa, iŋɛ jĩi ku so ŋa do jĩi ndii sɛɛdi ŋa, i saabuɛ ŋa.

¹⁰ Iŋɛ mɛɛmui sako do mɛɛmui inɔ ilu ŋa, iŋɛ yɛi ŋa do mii ku cã ilɛ ŋa, i saabuɛ ŋa.

¹¹ Iŋɛ ilaalu ŋa do inɛi andunya ŋa fei, iŋɛ amanlu ŋa do woo kiiti ŋa fei, i saabuɛ ŋa.

¹² Iŋɛ awaasũ do mudɛ̃ɛ ŋa, iŋɛ amu ŋa do mɔkɔ ngbo ŋa, i saabuɛ ŋa.

¹³ I saabu Aɔ̃ Lafɛ̃ɛ ŋa domi nŋu akãi bɛɛrɛi iriɛ í bɔ hee lele, nɔ ilaalu ku jɛɛ í wa lele do si ilɛ.

¹⁴ Í mua inɛɛ ŋa gbugbã. Inɛi Izirɛli ŋa iyi à jɛ dimi iyi í wa kɔkɔɛu, í jɔ̀ iri nŋa í nɛ amboe. I saabu Aɔ̃ Lafɛ̃ɛ ŋa.