Iri ku kɔ̃ 147 - Bibeli do fee

Gbugbãi Ilaaɔ̃ iyi à waa yɛ si andunya

¹ I saabu Aɔ̃ Lafɛ̃ɛ ŋa. Bii à kɔ̃ iri à waa saabu Ilaaɔ̃ Lafɛ̃ɛ, mii jiidai. Bii à waa cũu, í sĩa.

² Aɔ̃ Lafɛ̃ɛi í teese wa ma Zeruzalɛmu. Nŋui í tɔtɔɔ inɛi Izirɛli ŋa iyi à mu aru ŋau wa.

³ Nŋui í ya tũ inɔi inɛ ŋa iyi à wa si inɔ kufɔ. Nɔ nŋui í ya wiɛ juju nŋa ŋa.

⁴ Nŋui í ka leleaɔ̃ ŋa í mà jia nŋa. Nɔ í na aŋa fei iri akã akã.

⁵ Aɔ̃ Lafɛ̃ɛ nwa í la, nɔ gbugbãɛ í caa. Bisiɛ kù nɛ kɔɔ.

⁶ Aɔ̃ Lafɛ̃ɛ í ya sobi inɛ ŋa iyi à kaye ara nŋai ku ba a dede. Amma í ya kɛkɛ ilu inɔ kukã ŋai hee ilɛ.

⁷ I saabu Aɔ̃ Lafɛ̃ɛ do iri ku kɔ̃ ŋa. I kɔ̃ iri i na Ilaaɔ̃ Lafɛ̃ɛ nwa bɛɛrɛ do mɔɔlɔ ŋa.

⁸ Í ya bii lele do kudũi ijĩ ŋa. Nŋui í ya ce sɔɔlui ijĩ na ilɛ, nɔ nŋui í ya jɔ̀ fɔfɔ ŋa a fita si iri kuta ŋa.

⁹ Nŋui í ya na mɛɛmu ŋa sɔnda, nɔ nŋui í ya na amai gaagaa ŋa sɔnda waati iyi à waa dɔ̃ anu.

¹⁰ Kù jɛ si gbugbãi acĩi inɔ didɔ̃ɛ í wa. Kù nɔ kù jɛ si kaatoi amanɛi inɔ didɔ̃ɛ í wa.

¹¹ Inɛ ŋa iyi à mà bɛɛrɛɛ, nɔ à waa kaabaɛ, aŋai í ya bi.

¹² Zeruzalɛmu, kɔ̃ iri i saabu Aɔ̃ Lafɛ̃ɛ. Siɔ̃ɔ, cĩ Ilaaɔ̃ Lafɛ̃ɛɛ,

¹³ domi nŋui í jɔ̀ andɛ koofaɛ ŋa à nɛ gbugbã, nɔ í weea amaɛ ŋa iyi à wa bi tɛɛ.

¹⁴ Í jɔ̀ laakai ku sũ í lɔ si ilɛɛ, nɔ í jɔ̀ ì ba amaajɛ jiida.

¹⁵ Í jɔ̀ woodaɛ í naa si ilɛ, nɔ ideɛ í fangaa gbãa gbãa.

¹⁶ Í jɔ̀ nɛɛzu í cuku wa, í jɔ iwu, nɔ í jɔ̀ kutai ijĩ wɛwɛɛ gɔ ŋa à bii ilɛ à yɛi bɛi ilúlu.

¹⁷ Í jɔ̀ kutai ijĩ ŋau à waa cuku wa. Yooi á yɔkɔ ku leekĩ si tũtũ iyi í jɔ̀ wa ceu.

¹⁸ Bii í na wooda, kutai ijĩ ŋau à ya yɔi. Bii í jɔ̀ fufu í dede, inyi í ya maa cãi.

¹⁹ Í sisia tɔkui Zakɔbu dimii inɛi Izirɛli ŋau ideɛ ŋa do woodaɛ ŋa.

²⁰ Kù cea dimi mmu kãma bɛɛbɛ. Dimi mmu kãma kù mà woodaɛ ŋa. I saabu Aɔ̃ Lafɛ̃ɛ ŋa.