Iri ku kɔ̃ 146 - Bibeli do fee

Aɔ̃ Lafɛ̃ɛi wa mu hai nɛ gbugbã ŋa

¹ I saabu Aɔ̃ Lafɛ̃ɛ ŋa. Ǹ bi n saabu Aɔ̃ Lafɛ̃ɛ.

² An maa n saabuɛi waati iyi ǹ wɛɛ fei. An kɔ̃ iri n maa n cĩ Aɔ̃ Lafɛ̃ɛi si kuwɛɛm fei.

³ I maà jɔ̀ naanɛ nŋɛ ku wa si inɛ nlai andunya ŋau ihɛ̃ ŋa. Aŋa mɔ amanɛ ŋai, a kaa yɔkɔ a faaba inɛ.

⁴ Waati iyi à ku, à ya nyii si sãa, ajɔ nŋu bɛ gbakã lasabui mii iyi à bi ku ce fei í ya kpa irii.

⁵ Ilu inɔ didɔ̃i inɛ iyi Aɔ̃ Lafɛ̃ɛi Zakɔbu í jɛ woo faabaɛ, nɔ kpãa ku cɔɛ í wa si Aɔ̃ Lafɛ̃ɛɛ.

⁶ Aɔ̃ Lafɛ̃ɛi í ce lele do ilɛ do tenku do mii ŋa iyi à wa si fei. Nŋui í jɛ ilu naanɛ hee do ajɔ fei.

⁷ Aɔ̃ Lafɛ̃ɛi í ya nyaa hai nɛ gbugbã ŋa asaiya. Nŋui í ya muaa inɛ ŋa iyi ari wa kpa sɔnda. Nŋui í ya jɔ̀ inɛi piisɔ̃ɔ ŋa a nɛ ara nŋa.

⁸ Aɔ̃ Lafɛ̃ɛi í ya cĩ ijui fɛɛju ŋa. Aɔ̃ Lafɛ̃ɛi í ya jɔ̀ inɛ ŋa iyi à waa kɔmba à tɛ. Aɔ̃ Lafɛ̃ɛ í nɛ kubii inɛ dee dee ŋa.

⁹ Aɔ̃ Lafɛ̃ɛi í ya maa mu inɛ njoo ŋa. Í ya maa gbɔa kɔyɔ ŋa do jaaɔ̃ ŋa. Amma í ya kɛkɛ lasabui ilu inɔ kukã.

¹⁰ Aɔ̃ Lafɛ̃ɛ á jɛ bommai hee do ajɔ fei. Siɔ̃ɔ, Aɔ̃ Lafɛ̃ɛɛ á maa wɛɛi si tɔku do tɔku ŋa. I saabu Aɔ̃ Lafɛ̃ɛ ŋa.