Iri ku kɔ̃ 145 - Bibeli do fee

Bommaɛ á maa wɛɛi do ajɔ fei

1 Iri ku kɔ̃i saabuu ihɛ̃ ti Davidii.

¹ Iri ku kɔ̃i saabuu ihɛ̃ ti Davidii. Ilaaɔ̃ awɔ ilaalum, an fɔ kulaɛ. Ǹ bi n maa n cĩɛi do ajɔ fei.

² Ajɔ fei an maa n cĩɛi, nɔ n maa n saabuɛ do ajɔ fei.

³ Aɔ̃ Lafɛ̃ɛ, ì la nɔ ì to a maa cĩɛ. Kulaɛ kù nɛ kɔɔ.

⁴ Inɛ ŋa iyi à ce inɛ ngbo ŋai aa ya maa sisia awaasũ ŋa mii nla ŋa iyi ì ce.

⁵ An sisi bɛi inya kumái amboeɛ í la í to, nɔ an fɔ maamaakeɛ ŋa iyi ì ce.

⁶ Aa fɔ idei gbugbã nlaɛ. Amu mɔ an sisi mii nla ŋa iyi ì ce.

⁷ Inɛ ŋa aa maa ye gigii bɛi jiida ku jɛɛ í la í to. Nɔ aa maa dɔ̃ anui do inɔ didɔ̃ si gãmɛi dee dee ku jɛɛ.

⁸ Aɔ̃ Lafɛ̃ɛ, ì jɛ ilu araare, nɔ ì ya cea inɛ didɔ̃. Ì nɛ temua, nɔ jiida ku jɛɛ í la.

⁹ Aɔ̃ Lafɛ̃ɛ, ì jɛ jiidai bi inɛ fei. Ì nɛ kubii mii iyi í taka fei.

¹⁰ Aɔ̃ Lafɛ̃ɛ, mii ŋa iyi ì taka fei aa maa saabuɛi nɔ inɛɛ ŋa aa maa cĩɛi.

¹¹ Aa maa fɔ idei amboei bommaɛ, nɔ aa maa fɔ idei gbugbãɛi,

¹² ku ba inɛ ŋa a mà mii nla nla ŋa iyi ì ce, nɔ a yɛ bɛi amboei bommaɛ í sĩa í to.

¹³ Bommaɛ, bomma gɔi iyi á maa wɛɛ hee do ajɔ fei. Nɔ gbugbãi bommaɛu á maa wɛɛi hee si tɔku do tɔku ŋa fei. Aɔ̃ Lafɛ̃ɛ, awɔ ilu naanɛi si kuwãɛ ŋa fei. Ì ya nyisi kubiɛi si mii ŋa iyi ì waa ce fei.

¹⁴ Aɔ̃ Lafɛ̃ɛi, ì ya mua inɛ ŋa iyi à cuku gbugbã. Inɛ ŋa iyi a kù nɛ gbugbã, awɔi ì ya dede ŋa.

¹⁵ Aɔ̃ Lafɛ̃ɛ, inɛ ŋau fei kpãa ku cɔ nŋa siɛi í wa, nɔ awɔi aa na ŋa sɔnda nŋa si waati iyi í jɔ.

¹⁶ Ì ya fũ awɔɛi, nɔ ilu hunde fei í ya ba ijɛ ku jɛi hee ku yo.

¹⁷ Aɔ̃ Lafɛ̃ɛ, ì jɛ dee deei si kpãaɛ ŋa fei. Nɔ bɛɛbɛ mɔi ì ya nyisi jiida ku jɛɛ si icɛɛ ŋa fei.

¹⁸ Aɔ̃ Lafɛ̃ɛ, ì ya wa kɔkɔi inɛ ŋa iyi à waa kpeɛi. Nɔ inɛ ŋa iyi à waa kpeɛ do ntɔ fei,

¹⁹ aŋa iyi à mà bɛɛrɛɛ, mii iyi à bi ì ya cooi. Ì ya gbɔ anu ku dɔ̃ nŋai nɔ i faaba ŋa.

²⁰ Aɔ̃ Lafɛ̃ɛ, ì ya maa mu inɛ ŋa iyi à nɛ kubiɛ ŋa feii. Amma ì ya ce nfei ilu inɔ kukã ŋai fei.

²¹ Ǹ bi n maa n saabuɛi Aɔ̃ Lafɛ̃ɛ, nɔ mii ilu hunde fei ku maa cĩ awɔ iyi ì jɛ inɛ kumáu ajɔ fei hee do waati kãma fei.