Iri ku kɔ̃ 144 - Bibeli do fee

Kutɔɔi ilaalu

1 Iriu ihɛ̃ ti Davidii.

¹ Iriu ihɛ̃ ti Davidii. Ǹ wa n saabu Aɔ̃ Lafɛ̃ɛ iyi í jɛ kuta ku nɛ gbugbãm, nŋu iyi í ya kɔm si bɛi an ce igũ. Nŋui í ya ceem sɔɔlui igũu.

² Aɔ̃ Lafɛ̃ɛi í jɛ woo ceem jiida do woo kɔ̀ɔm. Nŋui í jɛ ile ku nɛ gbugbã bi ku manjim, nɔ nŋui í jɛ woo faabam. Nŋui í jɛ bɛi tɛlim nɔ nŋui í ya jɔ̀ dimi ŋa a maa ceem icɛ.

³ Aɔ̃ Lafɛ̃ɛ, yooi amanɛ í jɛ hee i maa gbɔaa, yooi amanɛ í jɛ hee i maa lasabu do nŋu.

⁴ Amanɛ í yɛi bɛi fufu. Kuwɛɛɛ í yɛi bɛi jĩjĩ iyi í ya sɛkɛɛ.

⁵ Aɔ̃ Lafɛ̃ɛ, jɔ̀ lele ku baa ilɛɛlɛ, nɔ i kita wa. Lu iri kuta ŋau nɔ cua ku bii ŋa.

⁶ Jɔ̀ kuŋɔi ijĩ ku naa nɔ ku jɔ̀ mbɛɛɛ ŋau a fangaa. Ta afaɛ ŋa wa nɔ zigi nŋa ku da.

⁷ Hai lele, yɔ awɔɛ ŋa i mum, nɔ i faabam hai si inyi nlau do hai si awɔi isɛ mmu ŋau.

⁸ Inɛ ŋau à ya maa sɔ iboi nɔ a fɔ do kugbasi a ni ntɔi aŋa à waa fɔ, amma a ci ya kɔ̃ kuwã nŋa.

⁹ Ilaaɔ̃, ǹ bi n kɔ̃ɛ iri titɔ̃ gɔ. Ǹ bi n kɔ̃ɛ iriui do mɔɔlɔ iyi í nɛ ikũ mɛɛwa.

¹⁰ Awɔi ì ya na ilaalui Izirɛli ŋa igũ ku jɛ. Awɔi ì ya nya Davidi woo ce icɛɛ hai si iku.

¹¹ Faabam nɔ i gbam hai si awɔi inɛ ŋa iyi à waa jɛ isɛ mmu ŋau. Aŋa iyi à ya maa sɔ ibo nɔ a fɔ do kugbasi a ni ntɔi aŋa à waa fɔ, amma a ci ya kɔ̃ kuwã nŋa.

¹² Ama inɛmɔkɔ nwa ŋa à yɛi bɛi jĩi ŋa iyi à dede anu akã hai kufita nŋa gbakã. Ama inaabo nwa ŋa mɔ à sĩai nɔ à yɛ bɛi kuta iyi à gbe à ceò sɔbei boodai kabai ilaalu.

¹³ Ì jɔ̀ suu nwa ŋa à kɔ̃ do amaajɛ dimi ikã ikã hee à dikã. Si inɔ iko nwa ŋa, angudã nwa ŋa à bí dubu dubu, gɔgɔ ŋa mɔm dubu ikɔ mɛɛwa.

¹⁴ Kɛtɛ nwa ŋa à la à ce ikpo. A ci ya ba kumɛɛ, nɔ bii à nɛ asĩ ci ya bɛjɛ. Anu ku dɔ̃i inɔ kufɔ kù wɛɛ si bantuma nwa ŋa.

¹⁵ Ilu inɔ didɔ̃i dimi iyi í ba bɛɛbɛ. Ilu inɔ didɔ̃i dimi iyi Aɔ̃ Lafɛ̃ɛ í jɛ Lafɛ̃ɛɛ.