Iri ku kɔ̃ 143 - Bibeli do fee

Aɔ̃ Lafɛ̃ɛ, maà kiitim

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, gbɔ kutɔɔm, nɔ i de itĩ si anu ku dɔ̃m ŋa. Jɛɛm si dee dee ku jɛɛ do ilu naanɛ ku jɛɛ.

² Amu woo ce icɛɛi, maà kiitim, domi inɛ kãma kù wɛɛ iyi kù nɛ taale si wajuɛ.

³ Mbɛɛ wa lelem. Í kɛkɛm nɔ wa tɛɛsɛm. Í jɔ̀ ǹ wa si inyai ilu kuku, bɛi inɛ ŋa iyi à ku hai ku kpɛ.

⁴ Ǹ kua gbugbã ntɔ ntɔ, inɔm í fɔ gbãna gbãna.

⁵ Ǹ ye gigii waatii tako. Ǹ cɔ mii ŋa iyi ì ce fei, nɔ ǹ lasabu si icɛi awɔɛ ŋa.

⁶ Ǹ wu awɔm ŋa wai ikpa bi tɛɛ. Si wajuɛ ǹ yɛi bɛi ilɛ ngbɛ iyi í nɛ bukaatai inyi. Kusĩmi.

⁷ Aɔ̃ Lafɛ̃ɛ, n kaa n yɔkɔ mái. Jɛɛm wa, maà kpɛ. Maà singaam wajuɛ, ku ba n maà n yɛ bɛi inɛ ŋa iyi à waa bɔ bi kuwai iku ŋa.

⁸ Nyisim jiida ku jɛɛ hai do daakɔ, domi awɔi ǹ wa n naanɛ. Jɔ̀ n mà kpãa iyi an too, domi awɔi ǹ daa kuwɛɛm si awɔ.

⁹ Aɔ̃ Lafɛ̃ɛ, nyam hai si awɔi mbɛɛm ŋa. Bi tɛɛi an manji.

¹⁰ Nyisim iyi ì bi n ce, domi awɔi ì jɛ Ilaaɔ̃ Lafɛ̃ɛm. Jɔ̀ hundeɛ ku maa gbãm do jiida ku jɛ si kpãa iyi í munga anu.

¹¹ Si bɛi awɔi ì jɛ Aɔ̃ Lafɛ̃ɛ, jɔ̀ n maa n wɛɛ. Si dee dee ku jɛɛ, nyam hai si wahala.

¹² Si jiida ku jɛɛ, jɔ̀ mbɛɛm ŋau a ku. Ce nfei mbɛɛm ŋau fei, domi amu woo ce icɛɛi.