Iri ku kɔ̃ 142 - Bibeli do fee

Aɔ̃ Lafɛ̃ɛ nŋu akãi á nyam si ijuukpã

¹ Iriu ihɛ̃ ti Davidii. Davidi wa ce kutɔɔ waati iyi í wa si isai kuta.

² Ǹ dɔ̃ anui hee lele ǹ wa n kpe Aɔ̃ Lafɛ̃ɛ, ǹ tɔɔɛi do anu ku dɔ̃ nla nla.

³ Ǹ sɔ̃ɔ bitandim. Ǹ sisiaa wahalam.

⁴ Waati iyi ǹ kua gbugbã, awɔi ì ya mà kpãa iyi an too. Si kpãa iyi ǹ wa n too siu à leem cɛkũm.

⁵ Cɔ do awɔ njɛm, aa yɛ iyi inɛ gɔ kù màm. N kù nɛ bii an manji. Inɛ gɔ kù waa lasabu do kuwɛɛm.

⁶ Aɔ̃ Lafɛ̃ɛ, awɔi ǹ kpe. Ǹ ni, awɔi ì jɛ bi ku manjim. Si andunyau ihɛ̃, awɔi ì jɛ ikpɛ̃m iyi ǹ nɛ n ba.

⁷ Gbɔ anu ku dɔ̃m, domi ǹ kua gbugbã ntɔ ntɔ. Nyam hai si awɔi inɛ ŋa iyi à waa kpãm ijuu, domi à nɛ gbugbã à rem.

⁸ Nyam hai ile piisɔ̃ɔ ku ba n maa n saabuɛ. Waati iyi aa ceem jiida, inɛ dee dee ŋai aa na a kaakom.