Iri ku kɔ̃ 141 - Bibeli do fee

Aɔ̃ Lafɛ̃ɛ, jɔ̀ i ya maa nɛ laakaii idem ŋa

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, ǹ wa n kpeɛi, naa i sobim nya nya. De sim itĩ waati iyi ǹ wa n kpeɛ.

² Jɔ̀ kutɔɔm ku to wa siɛ bɛi cuai tuae iyi í nɛ inunu jiida. Nɔ awɔ ku wum nɔu ku yɛ bɛi kuweei alɛ.

³ Aɔ̃ Lafɛ̃ɛ, jɔ̀ i ya maa ce laakaii ide ku fɔm ŋa, maà jɔ̀ ide laalɔ ku ya fita hai si gɛlɛm.

⁴ Maà jɔ̀ n nɛ lasabui laalɔ ku ce, maà jɔ̀ n maa n too kucei ilu inɔ kukã ŋa, maà jɔ̀ n jɛ jingau do aŋa.

⁵ Bii inɛ dee dee wa cãm wa nyisim kubii. Bii wa niim kai, í yɛ bɛi ikpo jiidai wa tontoom si iri, nɔ n kaa n kɔ̀. Amma an maa n mɔsi do kutɔɔm nii si gãmɛi laalɔ ku cei ilu inɔ kukã ŋa.

⁶ Waati iyi aa tale woo kiiti nŋa ŋau si isai kuta, inɛ ŋa aa gbɔ idem ŋa nɔ aa mà iyi ide ŋau à jɛ ntɔ.

⁷ Bɛi ilɛ í ya la ku cĩ bɛɛbɛi bi kuwai iku ŋa á cĩ ku ba ku mi kũkũ nŋa ŋa iyi à fangaa bii feiu.

⁸ Ilaaɔ̃ Lafɛ̃ɛm, do ikpa bi tɛɛi ǹ sinda ijum wa. Bi tɛɛi an manji. Mu kuwɛɛm.

⁹ Maà jɔ̀ n dasi cɛkũm do taao iyi inɛ laalɔ ŋa à leem.

¹⁰ Jɔ̀ ilu inɔ kukã ŋau a dasi cɛkũm dii aŋa taka nŋau nɔ amu n ba n fita si.