Iri ku kɔ̃ 140 - Bibeli do fee

Kutɔɔi inɛ iyi à kaakoɛ do arabu ŋa

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Aɔ̃ Lafɛ̃ɛ, faabam hai si awɔi inɛ laalɔ ŋa. Nyam hai si awɔi woo kpa inɛ ŋa.

³ Si idɔ nŋa, laalɔi à ya maa lasabu ku ce, nɔ ajɔ fei, sɔɔlui igũi à ya maa ce.

⁴ Amɛ̀ nŋa í gbe anui bɛi ti njo, nɔ gɛlɛ nŋa í nɛ acĩi bɛi ti njo wukuku. Kusĩmi.

⁵ Aɔ̃ Lafɛ̃ɛ, maà jɔ̀ n dasi awɔi ilu inɔ kukã ŋa, nyam hai si awɔi woo kpa inɛ ŋa.

⁶ Ilu faau ŋa à leem cɛkũm do taao ŋa, nɔ à leem taa ŋa si itĩ kpãau bii fei. Kusĩmi.

⁷ Nɔ ǹ sɔ̃ Aɔ̃ Lafɛ̃ɛ ǹ ni, awɔi ì jɛ Ilaaɔ̃ Lafɛ̃ɛm. Aɔ̃ Lafɛ̃ɛ, de si kutɔɔm ŋa itĩ.

⁸ Aɔ̃ Lafɛ̃ɛ, awɔi ì jɛ inɛ iyi í faabam do gbugbãɛ. Awɔi ì ya bii irim si waatii igũ.

⁹ Aɔ̃ Lafɛ̃ɛ, maà jɔ̀ mii iyi ilu inɔ kukã í biu ku ce. Maà jɔ̀ icɛɛ ŋa ku ce ku ba ku maà so araɛ lele. Kusĩmi.

¹⁰ Inɛ ŋa iyi à kaakom nɔu jɔ̀ ide laalɔ ŋa iyi à waa fɔ ku cuku si iri nŋa.

¹¹ Jɔ̀ ina nyɛnyɛ ŋa a cuku si ŋa wa, jɔ̀ a dasi isa nla si inau, nɔ a maà yɔkɔ a fita má.

¹² Maà jɔ̀ woo fɔ laalɔi inɛ mmu ŋa a ba gbugbã si ilɛu, jɔ̀ laalɔ ku maa too woo taa inɛ ŋa gbugbã ŋau hee koo ce nfe nŋa.

¹³ Ǹ mà iyi Aɔ̃ Lafɛ̃ɛi í ya cea hai nɛ gbugbã ŋa kiiti dee dee, nɔ nŋui í ya jɔ̀ ilu are ŋa a ba ntɔ.

¹⁴ Ntɔi, inɛ dee dee ŋa aa maa cĩ Aɔ̃ Lafɛ̃ɛ, inɛ ŋa iyi idɔ nŋa í máui aa wa si wajuɛ.