Iri ku kɔ̃ 139 - Bibeli do fee

Aɔ̃ Lafɛ̃ɛ, ì màm sãa sãa

1 Iriu ihɛ̃ ti inɛ ngboi woo kɔ̃ iri ŋai do Davidi.

¹ Iriu ihɛ̃ ti inɛ ngboi woo kɔ̃ iri ŋai do Davidi. Aɔ̃ Lafɛ̃ɛ, awɔi ì wusɛm hee lɛlɛ, nɔ ì màm.

² Ì mà waati iyi ǹ wa n buba walakɔ ǹ dede ǹ leekĩ. Ì mà lasabum ŋa baa hai jĩijĩ.

³ Ì mà waati iyi ǹ wa n nɛ walakɔ ǹ wa n sũ. Ì mà mii ŋa iyi ǹ wa n ce fei.

⁴ Hai ide kù naa si gɛlɛm mɔm, ì mà tã ide iyi an fɔ.

⁵ Awɔi ì ya waam waju do anyi, nɔ ì ya lesim awɔɛ.

⁶ Dimii kumà bɛɛbɛ, í jɛɛm maamaake nla nla. Í la hee n kaa n yɔkɔ n mà yaaseɛ.

⁷ Iwoi an yɔkɔ n bɔ n manjiɛ. Iwoi an yɔkɔ n sa n bɔ n jĩòɛ.

⁸ Bii ǹ gũ lelei, ì wa bɛ. Bii ǹ sũ bi kuwai iku ŋa, ì wa bɛ má.

⁹ Bii ǹ fo n nɛ̀ ikpa nunui daakɔ walakɔ ikpa nunui alɛ do alalai tenku,

¹⁰ bɛ má, awɔɛi á maa gbãm nɔ awɔ njɛɛi á maa mum dim dim.

¹¹ Bii ǹ ni ilu kùkù ku biim, idũ, inya kumái í ya kaakom.

¹² Baa ilu kuku ci ya jɛ ilu kuku bi tɛɛ, nɔ idũ inya í ya mái bɛi dasã. Ilu kuku do inya kumá fei bi titɛɛ akãi.

¹³ Awɔi ì ce ikɔ̃ ikɔ̃i aram fei, nɔ awɔi ì wɔ̃m si inɔi iyem.

¹⁴ Ǹ wa n saabuɛ domi awɔi ì takam do maamaake nlaɛ. Hee si lɛlɛi idɔm, ǹ mà sãa sãa iyi mii nla ŋa iyi ì ce fei maamaake nla nlai.

¹⁵ Waati iyi ì waa mam si asii, nɔ ì waa wɔ̃m si inɔi iyem, aram bii kãma kù waa manjiɛ.

¹⁶ Waati iyi ǹ sinti si inɔi iyem gbakã, ì waa yɛm. Si tiaɛ, ajɔ ŋa iyi ì jilɛɛm si kuwɛɛm fei ì kɔɔ tã hee ajɔ ŋau a maa sinti.

¹⁷ Ilaaɔ̃, í gaabum n mà lasabuɛ domi lasabuɛ í kpɔ í caa.

¹⁸ Bii ǹ wa n ka ŋa, à kpɔ à re baa kuta wɛwɛɛi sãa. Baa bii ǹ yɔkɔ ǹ ka ŋa feii, n kaa n yɔkɔ n mà yaaseɛ.

¹⁹ Aɔ̃ Lafɛ̃ɛ, jɔ̀ ilu inɔ kukã ŋau a ku nɔ woo kpa inɛ ŋau a jĩim.

²⁰ Mbɛɛɛ ŋau, do ideɛi à ya maa zambaò inɛ ŋa. Do iriɛi à ya maa ceò laalɔ.

²¹ Aɔ̃ Lafɛ̃ɛ, ǹ cé inɛ ŋa iyi à céɛ ŋa. Ǹ cé inɛ ŋa iyi à waa ce ide ku kɔ̀ si gãmɛɛ.

²² Ǹ cé ŋai ntɔ ntɔ, nɔ à baa à jɛ mbɛɛi amu takam.

²³ Ilaaɔ̃, wusɛm, nɔ i yɛ idɔm. Cɔ laakaim, nɔ i mà lasabum ŋa.

²⁴ Cɔ bii í jɛ kpãa laalɔi ǹ wa n too, nɔ i baam wa si kpãa jiida hee do ajɔ fei.