Iri ku kɔ̃ 137 - Bibeli do fee

À waa buba si itĩi idoi Babilɔni ŋa

¹ À waa bubai si itĩi idoi Babilɔni ŋa, à waa kpata, à waa yeò gigii Siɔ̃ɔ.

² Si jĩi ndii itĩi ido ŋau bɛi à kɔa mɔɔlɔ nwa ŋa.

³ Nɔ bɛ inɛ ŋa iyi à jɛ wa igũ ŋa à ni ka kɔ̃a aŋa iri. Inɛ ŋa iyi à waa ta nwa gbugbã ŋa à ni ka kɔ̃a aŋa irii Siɔ̃ɔ ŋa do inɔ didɔ̃.

⁴ Amma bɛirei aa ka ce ka yɔkɔ ka kɔ̃a Aɔ̃ Lafɛ̃ɛ iri, si ilɛ mmu.

⁵ Zeruzalɛmu, bii ǹ gbɛjɛɛ, awɔ njɛm ku ce kɔ̃ɔ.

⁶ Zeruzalɛmu, bii n kù wa n ye gigiɛ, bii n kù jilɛɛ í jɛ icui inɔ didɔ̃ fei, jɔ̀ amɛm ku mási gɛlɛm.

⁷ Aɔ̃ Lafɛ̃ɛ, maà gbɛjɛ ide iyi inɛi Edɔmu ŋa à fɔ, si ajɔ iyi à mu inɛi Zeruzalɛmu ŋau à ni a kɛkɛ iluu mam mam hee ilɛ si icuɛ.

⁸ Awɔ Babilɔni iyi aa ce nfeɛ kaa kpɛ, ilu inɔ didɔ̃i inɛ iyi á sãaɛ laalɔ iyi ì ce nwa.

⁹ Ilu inɔ didɔ̃i inɛ iyi á mu amaɛ ŋa ku cã ŋa si kuta.