Iri ku kɔ̃ 135 - Bibeli do fee

Ǹ mà iyi Aɔ̃ Lafɛ̃ɛ í la

¹ I saabu Aɔ̃ Lafɛ̃ɛ ŋa, i saabu Aɔ̃ Lafɛ̃ɛ ŋa. I saabu Aɔ̃ Lafɛ̃ɛ ŋa iŋɛ woo ce icɛɛ ŋa,

² iŋɛ iyi ì ya maa tɔɔ si kpasɛ̃i Aɔ̃ Lafɛ̃ɛ nwa, iŋɛ iyi ì wa si bantumai kpasɛ̃ɛ.

³ I saabuɛ ŋa domi í jɛ jiida. I kɔ̃ iri do iriɛ ŋa domi í nɛ kubi.

⁴ Aɔ̃ Lafɛ̃ɛi í cicaa araɛ tɔkui Zakɔbu ŋa nɔ nŋui í jilɛ aŋa inɛi Izirɛli ŋa a jɛ titɛɛ.

⁵ Ntɔ ntɔ ǹ mà iyi Aɔ̃ Lafɛ̃ɛ í la, nɔ Aɔ̃ Lafɛ̃ɛ nwai í wa si antaii iwɛ̃ baa yooma fei.

⁶ Mii iyi Aɔ̃ Lafɛ̃ɛ í bi feii í ya ce si lele do si ilɛ, si inɔ tenku hee do si lɛlɛi tenku fei.

⁷ Nŋui í ya jɔ̀ kudũi ijĩ ŋa a dede hai kɔɔi ilɛ ŋa. Nŋui í ya jɔ̀ ijĩ ku maa ŋɔ nɔ ku jɔ̀ ku wɔ. Nŋui í ya fũsi fufu awɔ ku jɔ̀ ku maa ce.

⁸ Nŋui í kpa mii ilu hunde iyi à bí sinte fei si ilɛi Ezibiti. Hai amanɛ hee ku koo si mɛɛmu nŋa ŋa fei.

⁹ Nŋui í jɔ̀ à ce mii nla ŋa do maamaake ŋa si ilɛi Ezibiti, bi ilaalu Faraɔ̃ do bi woo ce icɛɛ ŋa fei.

¹⁰ Nŋui í jɔ̀ à kpa inɛi ilɛ nkpɔ, nɔ í jɔ̀ à kpa ilaalu ilu gbugbã ŋa.

¹¹ Nŋui í jɔ̀ à kpa Sioni ilaalui inɛi Amɔre ŋa, do Ɔgu ilaalui ilɛi Basãa, do ilaalui ilɛi Kanaã ŋa fei.

¹² Nɔ nŋui í so ilɛ nŋau í na inɛi Izirɛli inɛɛ ŋa í jɛ tubu nŋa.

¹³ Aɔ̃ Lafɛ̃ɛ, iriɛ á maa wɛɛi do ajɔ fei. Tɔku do tɔku ŋa aa maa ye gigiɛi waati kãma fei.

¹⁴ Ntɔ ntɔ Aɔ̃ Lafɛ̃ɛ á kiiti inɛɛ ŋa ku jɔ̀ a ba ntɔ. Nɔ nŋui á ce araarei woo ce icɛɛ ŋa.

¹⁵ Iwɛ̃ ŋa iyi dimi mmu ŋa à ce do isɔ fũfũ do wurau, icɛi awɔi amanɛ ŋai.

¹⁶ À nɛ gɛlɛ, amma a ci ya fɔ ide. À nɛ iju, amma a ci ya yɛ ilu.

¹⁷ À nɛ itĩ, amma a ci ya gbɔ ide. À nɛ gɛlɛ amma a kù nɛ ami si gɛlɛ nŋa.

¹⁸ Inɛ ŋa iyi à ce ŋa nɔ à waa naanɛ ŋa ŋau à jɔ ŋa.

¹⁹ Iŋɛ inɛi Izirɛli ŋa, i cĩ Aɔ̃ Lafɛ̃ɛ ŋa. Iŋɛ tɔkui Arɔ̃ɔ ŋa, i cĩ Aɔ̃ Lafɛ̃ɛ ŋa.

²⁰ Iŋɛ inɛi Levii ŋa, i cĩ Aɔ̃ Lafɛ̃ɛ ŋa. Iŋɛ iyi ì mà bɛɛrɛi Aɔ̃ Lafɛ̃ɛ, i cũu ŋa.

²¹ I cĩ Aɔ̃ Lafɛ̃ɛ hai Siɔ̃ɔ ŋa, nŋu iyi í wa Zeruzalɛmu. I saabu Aɔ̃ Lafɛ̃ɛ ŋa.