Iri ku kɔ̃ 132 - Bibeli do fee

Siɔ̃ɔ, kpasɛ̃i Aɔ̃ Lafɛ̃ɛi nɔ bɛi í jɛ ilui Davidi

1 Iri ku kɔ̃i kutɔɔ ku bɔ ku ce.

¹ Iri ku kɔ̃i kutɔɔ ku bɔ ku ce. Aɔ̃ Lafɛ̃ɛ, ye gigii Davidi na wahala ŋa iyi wa ce fei.

² Davidi í cea Aɔ̃ Lafɛ̃ɛ ilu gbugbãi Zakɔbu kuwã do kugbasi í ni,

³ n kaa n lɔ si ilei acɔm nɔu má, n kaa n sũ si daayim nɔu má,

⁴ n kaa n siiko hee má jɛ n sĩ njoo,

⁵ í gbe hee bii n ba inya tengi bii an maa Aɔ̃ Lafɛ̃ɛ ilu gbugbãi Zakɔbuu kpasɛ̃.

⁶ Hai Efaratai à gbɔ baaui kpakoi akabuuu, nɔ à koo à yɔɔ si bubaai Yaa.

⁷ Ka bɔ kpasɛ̃i Aɔ̃ Lafɛ̃ɛ kaa gulɛ si wajui bi ku lesi isɛɛ.

⁸ Aɔ̃ Lafɛ̃ɛ, dede i naa si inyai bi kusĩmiɛu awɔ do kpakoi akabuuɛu, kpako si bii gbugbãɛ í wau.

⁹ Jɔ̀ faabau ku jɛ bɛi ibɔ iyi woo weeɛ ŋa aa dasi, nɔ inɛ ŋa iyi naanɛ nŋa í wa siɛ, a maa dɔ̃ anu do inɔ didɔ̃.

¹⁰ Na kubii Davidi woo ce icɛɛ, maà kɔ̀si inɛ iyi ì nya ikã ì tontooa ikpo si iriu.

¹¹ Aɔ̃ Lafɛ̃ɛ í cea Davidi kuwã do kugbasi gɔ, nɔ kaa dede si pai. Í ni si tɔkuɛ ŋa, nŋu á ya jɔ̀ inɛ akã ku ya buba si agbɛɛ si kitãi bommau.

¹² Bii amaɛ ŋa à waa jirima akabuui nŋu do ide ŋa iyi nŋu í kɔ ŋa siu, ama nŋa ŋa mɔ aa ya na a buba si kitãi bommaɛui hee do ajɔ fei.

¹³ Ntɔ ntɔ, Aɔ̃ Lafɛ̃ɛi í cica Siɔ̃ɔ. Í cicaɛi ku jɛ bi kuwaɛ.

¹⁴ Nɔ í ni, inyau bɛi an ya n sĩmi bɛi an ya n wa, domi bɛi ǹ bi.

¹⁵ An jɔ̀ amaajɛ ku wɛɛa Siɔ̃ɔ ntɔ ntɔ. Ilu areɛ ŋa fei aa ya ba sɔnda iyi à nɛ bukaataɛ.

¹⁶ Jɔ̀ faabau ku jɛ bɛi ibɔ iyi woo weeɛ ŋa aa dasi, nɔ inɛ ŋa iyi naanɛ nŋa í wa siɛ, a maa dɔ̃ anu do inɔ didɔ̃.

¹⁷ An jɔ̀ ilaalu ilu gbugbã gɔ ku fita wa hai si nyaanzei Davidi. Kpasɛ̃i inɛ iyi ǹ cica ǹ jɔ̀ à tontooa ikpo si iriu á maa wɛɛ si ilaalu ku jɛ hee do ajɔ fei.

¹⁸ An jɔ̀ anyɔ ku bii mbɛɛɛ ŋai nɔ siɛi fulai ilaaluu á maa wa.