Iri ku kɔ̃ 12 - Bibeli do fee

Idei Aɔ̃ Lafɛ̃ɛ si andunya iyi í bɛjɛ

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do mɔɔlɔ ilu ikũ mɛɛjɔ.

² Aɔ̃ Lafɛ̃ɛ, faaba wa, domi wee ilu naanɛ ŋa à waa tã. Nɔ inɛ dee dee kãma kù wa si andunya má.

³ Inɛ ŋa à ya maa sɔ irii njɛi nɔ à maa sɔa njɛ ibo. Idɔ nŋa kù jɛ dee dee.

⁴ Aɔ̃ Lafɛ̃ɛ, jɔ̀ idei ilu gɛlɛ didɔ̃ ŋau ku tã nɔ ilu faau ŋa a coko.

⁵ Inɛ ŋau à fɔ à waa ni, na saabui gɛlɛ nwai à nɛ gbugbã nɔ à mà ide ku fɔ nɔ a kù waa ce njoi inɛ kãma.

⁶ Aɔ̃ Lafɛ̃ɛ í ni, nsɛi, si na iyi í jɔ̀ à waa taa hai nɛ gbugbã ŋa gbugbã nɔ ilu are ŋa à waa wahala, an dede n sobi ŋa. An faaba inɛ ŋa iyi inɛ ŋa à jɔ̀ à waa taabiu.

⁷ Idei Aɔ̃ Lafɛ̃ɛ ŋa à mái bɛi isɔ fũfũ iyi à yɔ si bi ku yɔ fii mɛɛje.

^8-9 Baa bii inɛ laalɔ ŋa à waa dabii bii fei, nɔ inɛ ŋa à bɛjɛ à waa koo, Aɔ̃ Lafɛ̃ɛ, awɔi aa maa mu awa hai nɛ gbugbã ŋau, nɔ i maa degbe wa si awɔi inɛ laalɔ ŋau bɛ do ajɔ fei.