Iri ku kɔ̃ 119 - Bibeli do fee

Asii do jiida ku jɛi woodai Ilaaɔ̃ ŋa

¹ Ilu inɔ didɔ̃ ŋai inɛ ŋa iyi isɛɛnɛ nŋa kù nɛ taale, nɔ à waa jirima woodai Aɔ̃ Lafɛ̃ɛ.

² Ilu inɔ didɔ̃ ŋai inɛ ŋa iyi à waa ceò ideɛ ŋa icɛ, nɔ à waa dɛdɛɛ do idɔ nŋa fei.

³ Aŋau bɛi a kù waa ce mii laalɔ kãma, amma à waa jɛ kuwɛɛ nŋai bɛi Ilaaɔ̃ í bi.

⁴ Awɔ Aɔ̃ Lafɛ̃ɛ ì nyisi inɛ ŋa asaiyaɛ ŋa ku ba a maa jirima ŋa dee dee.

⁵ Ǹ bi isɛɛnɛm ku jɛ dee deei, nɔ n maa n jirima ideɛ ŋa.

⁶ Do yaase bɛɛbɛ, anyɔ kaa mum bii ǹ wa n lasabu si woodaɛ ŋa fei.

⁷ An maa n cĩɛi do idɔ iyi í má, n maa n ceò cioi asaiyaɛ ŋa iyi à jɛ dee dee.

⁸ Ǹ bi n maa n jirima ideɛ ŋai, maà fũsim awɔ mam mam.

⁹ Bɛirei awaasũ á ce ku ce isɛɛnɛ iyi í má. Bii wa jirima ideɛ ŋai.

¹⁰ Ǹ wa n dɛdɛɛi do idɔm fei. Maà jɔ̀ n yaa hai si woodaɛ ŋa.

¹¹ Ǹ wa n mu ideɛ ŋai si idɔm, ku ba n maà n ce dulum bi tɛɛ.

¹² Aɔ̃ Lafɛ̃ɛ, saabu ku jɛ titɛɛ. Kɔm si ideɛ ŋa.

¹³ An maa n sisi idei asaiyaɛ ŋa iyi ì fɔu fei.

¹⁴ Ideɛ ŋa ku too í ya jɔ̀ n nɛ inɔ didɔ̃i bɛi inɛ iyi í nɛ amani nla nla.

¹⁵ Ǹ ya n maa n lasabui si woodaɛ ŋa, nɔ ijum í ya maa kãsi kpãa iyi ì waa nyisim.

¹⁶ Ǹ ya n nɛ inɔ didɔ̃i si kukɔɛ ŋa ku jirima. N kaa n gbɛjɛ ideɛ.

¹⁷ Cea amu woo ce icɛɛ jiida, ku ba n wɛɛ, nɔ n maa n jirima ideɛ.

¹⁸ Cĩ ijum ŋa ku ba n yɛ jiida ku jɛi woodaɛ ŋa.

¹⁹ Amu inɛ njooi si ilɛu ihɛ̃. Maà singaam woodaɛ ŋa.

²⁰ Waati kãma fei, ǹ ya n maa n dɛdɛ asaiyaɛ ŋa ku mài.

²¹ Ì ya kpã ilu faau ŋa ijui aŋa iyi à jɛ ilu ikpe ŋa, nɔ à jĩò woodaɛ ŋa.

²² Jɔ̀ n fita si arabu do yaako ŋa, domi ǹ wa n jirima ideɛ ŋa.

²³ Baa do iyi inɛ ngbo ŋa à buba à waa dĩim anu tɔɔsii zamba fei, amu woo ce icɛɛ, an maa n lasabui si ideɛ ŋa.

²⁴ Ideɛ ŋaui à ya jɔ̀ n nɛ inɔ didɔ̃. Aŋai à ya maa kɔm.

²⁵ Cɔ wee ǹ wa ilɛ si sãa, jɔ̀ n ba kuwɛɛ bɛi ì ce kuwãɛu.

²⁶ Ǹ sisiɛ yaasei kuwɛɛm fei, nɔ ì jɛɛm. Jɔ̀ n mà ideɛ ŋa.

²⁷ Jɔ̀ n gbɔ yaasei woodaɛ ŋa ku ba n maa n lasabu si icɛ maamaakeɛ ŋa.

²⁸ Inɔ kufɔ í jɔ̀ ǹ wa n kpata. Jɔ̀ n dede si yaase bɛi ì ce kuwãɛu.

²⁹ Jɔ̀ isɛɛnɛi ibo ku jĩòm. Si jiida ku jɛɛ, jɔ̀ n mà woodaɛ ŋa.

³⁰ Ǹ cica kpãai dee dee ku jɛ. Nɔ ǹ wa n jirima asaiyaɛ ŋa.

³¹ Aɔ̃ Lafɛ̃ɛ, si ideɛ ŋai lasabum í ya wa. Maà jɔ̀ n yɛ anyɔ.

³² Si kpãai woodaɛ ŋai ǹ ya n maa n sɛi si domi awɔi ì jɔ̀ idɔm í wɛɛò laakai ku sũ.

³³ Aɔ̃ Lafɛ̃ɛ, nyisim kpãa iyi ì bi n too ku ba n tooɛ hee kɔɔ.

³⁴ Jɔ̀ n gbɔ yaasei woodaɛ ŋa, ku ba n maa n too ŋa nɔ n jirima ŋa do idɔm fei.

³⁵ Jɔ̀ n maa n nɛ si kpãai woodaɛ ŋa, domi si bɛi an ba inɔ didɔ̃.

³⁶ Jɔ̀ idɔm ku wa si ideɛ ŋa. Maà jɔ̀ ku wa si amani.

³⁷ Sinda wajum hai si mii ngbɛ ngbɛ ŋa. Jɔ̀ n maa n jɛ kuwɛɛm si yaase bɛi á dɔ̃ɛ si.

³⁸ Kuwã iyi ì cea inɛ ŋa iyi à mà bɛɛrɛɛ ŋau, jɔ̀ ku kɔ̃ si kuwɛɛi amu woo ce icɛɛ.

³⁹ Jɔ̀ n fita hai si anyɔ iyi wa da zigim, domi asaiyaɛ ŋai à jɛ jiida.

⁴⁰ Lasabu iyi ǹ nɛ ntɔ ntɔi í jɛ n too si asaiyaɛ ŋa. Jɔ̀ n wɛɛ si bɛi ì jɛ dee dee.

⁴¹ Aɔ̃ Lafɛ̃ɛ, jɔ̀ jiida ku jɛɛ ku naa sim. Faabam si bɛi ì ce kuwãɛu.

⁴² Jɔ̀ n ba ide iyi an jɛa inɛ ŋa iyi à waa bum, domi ideɛi ǹ dasi naanɛ.

⁴³ Sobim waati kãma fei n ya n fɔ ntɔ, domi kpãa ku cɔm í wai si kiitiɛ.

⁴⁴ An maa n jirima woodaɛ ŋai ajɔ fei nɔ kaa nɛ kɔɔ.

⁴⁵ An maa n nɛi do ara ku fũ domi woodaɛ ŋai ǹ bi n maa n nɛ si.

⁴⁶ An fɔ ideɛ ŋai bi ilaalu ŋa, n kaa n ce anyɔ.

⁴⁷ Ǹ bi woodaɛ ŋa. Woodaɛ ŋau à ya jɔ̀ n maa n nɛ inɔ didɔ̃.

⁴⁸ Bii ǹ wa n ce kutɔɔ, ǹ ya n wu awɔm ŋai na woodaɛ ŋa iyi ǹ biu. Ǹ ya n maa n lasabui si ideɛ ŋa.

⁴⁹ Ye gigii ide iyi ì sɔ̃ amu woo ce icɛɛ. Ideui í jɔ̀ ǹ nɛ kpãa ku cɔ.

⁵⁰ Mii iyi í ya tũ idɔm si ijuukpãm nii í jɛ ideɛ iyi í jɔ̀ ǹ wɛɛ.

⁵¹ Ilu faau ŋa à waa yaakom, do nŋu fei n kù toa woodaɛ ŋa anyi.

⁵² Aɔ̃ Lafɛ̃ɛ, ǹ ye gigii kiitii takoɛ ŋau, nɔ laakaim í sũ.

⁵³ Idɔm í ya kɔ̃i ntɔ ntɔ na inɛ laalɔ ŋa iyi à fũsi woodaɛ ŋa awɔ.

⁵⁴ Ideɛ ŋai à jɛ icui iri ku kɔ̃m ŋa si ilɛ bii ǹ wa n jɛ bɛi inɛ njoo.

⁵⁵ Aɔ̃ Lafɛ̃ɛ, idũ ǹ ya n maa n ye gigii inɛ iyi ì jɛi, nɔ n maa n jirima woodaɛ ŋa.

⁵⁶ Iyi í jɛ titom nii í jɛ, n maa n jirima woodaɛ ŋa.

⁵⁷ Aɔ̃ Lafɛ̃ɛ, ǹ fɔ ǹ wa n sisii, iyi í jɛ titom nii í jɛ ǹ ya n maa n jirima ideɛ ŋa.

⁵⁸ Ǹ wa n dɛdɛi do idɔm fei n ceɛ mii iyi á dɔ̃ɛ si. Ceem didɔ̃ si bɛi ì ce kuwãɛ.

⁵⁹ Ǹ lasabu si isɛɛnɛm, nɔ ǹ bi n nyi wa si ideɛ ŋa.

⁶⁰ Ǹ wa n saasa, n ci ya n ce atafii si woodaɛ ŋa ku jirima.

⁶¹ Cɛkũm dii ilu inɔ kukã ŋa í mum, amma n kù gbɛjɛ woodaɛ ŋa ku jirima.

⁶² Idũ laja, ǹ ya n dedei n maa n saabuɛ, na kiiti dee deeɛ ŋa iyi ì ce.

⁶³ Inɛ ŋa iyi à mà bɛɛrɛɛ ŋa, do inɛ ŋa iyi à waa jirima woodaɛ ŋa, inɛ akã nŋai ǹ jɛ.

⁶⁴ Aɔ̃ Lafɛ̃ɛ, jiida ku jɛɛ í kɔ̃ andunyau fei. Kɔm si woodaɛ ŋa.

⁶⁵ Aɔ̃ Lafɛ̃ɛ, ì cea amu woo ce icɛɛ jiidai si bɛi ì ce kuwãɛu.

⁶⁶ Kɔm bɛi an ya n wũaa woodaɛ ŋa dee dee nɔ n mà yaaseɛ, domi si ŋai naanɛm fei í wa.

⁶⁷ Hee wahala ku maa bam, ǹ nyɔi wo. Amma nsɛi, ǹ wa n jirima ideɛ.

⁶⁸ Awɔ inɛ jiidai, nɔ mii iyi í jɛ jiidai ì ya ce. Kɔm si woodaɛ ŋa.

⁶⁹ Ilu faau ŋa à waa bi a fam si ibo nŋa, amma amu, ǹ wa n mu woodaɛ ŋai hee si lɛlɛi idɔm.

⁷⁰ Idɔ nŋa í lelei bɛi kuta, amma amu, ǹ ya n nɛ inɔ didɔ̃i si woodaɛ ŋa ku jirima.

⁷¹ Bi tom wahala í jɛɛm mii jiida. Nŋui í jɔ̀ ǹ wa n ce cioi ideɛ ŋa.

⁷² Wooda ŋa iyi à fita hai si gɛlɛɛ, à sĩaam si à re mii ndii wura dubu do isɔ fũfũ dubu.

⁷³ Awɔɛ ŋai à cem, aŋai à muum gbugbã. Muum bisi jiida ku ba n gbɔ yaasei woodaɛ ŋa.

⁷⁴ Inɛ ŋa iyi à mà bɛɛrɛɛ ŋa à waa yɛm nɔ à nɛ inɔ didɔ̃, domi kpãa ku cɔm si ideɛi í wa.

⁷⁵ Aɔ̃ Lafɛ̃ɛ, ǹ mà iyi kiitiɛ ŋai à jɛ dee dee, nɔ ì nɛ ntɔ iyi ì kpãm iju.

⁷⁶ Jɔ̀ jiida ku jɛɛ ku muum gbugbã bɛi ì cea amu woo ce icɛɛ kuwãɛu.

⁷⁷ Jɔ̀ araareɛ ku naa sim ku ba n wɛɛ, domi woodaɛ ŋa ku jirimai í ya jɔ̀ n nɛ inɔ didɔ̃.

⁷⁸ Jɔ̀ anyɔ ku jɛ ti ilu faau ŋa iyi à waa ceem laalɔ ngbɛ ngbɛ. Amu, ǹ ya n maa n lasabui si woodaɛ ŋa.

⁷⁹ Jɔ̀ inɛ ŋa iyi à mà bɛɛrɛɛ ŋa a sinda wa bi tom, aŋa iyi à mà ideɛ ŋa.

⁸⁰ Jɔ̀ idɔm ku jɛ dee dee si ideɛ ŋa ku ba anyɔ ku maà biim.

⁸¹ Ǹ wa n dɛdɛ sobiɛi ntɔ ntɔ, kpãa ku cɔm í wai si ideɛ.

⁸² Ijum í gbɛɛji do kuwãɛu ku degbe. Nɔ ǹ ni, waati yoomai aa na i tũ idɔm.

⁸³ Ǹ yɛi wo bɛi bɔgɔ bata iyi wa fĩ cua. Do nŋu fei, n kù gbɛjɛ ideɛ ŋa.

⁸⁴ Zaka bɛirei kusɔi kuwɛɛm wa gbe. Waati yoomai aa kiiti woo kpãm iju ŋau.

⁸⁵ Ilu faau ŋa iyi a kù mà woodaɛ ŋa, à tuum isa si wajum.

⁸⁶ Woodaɛ ŋa fei, dee deei à jɛ. Inɛ ŋa à waa kpãm iju ngbɛ ngbɛ, faabam.

⁸⁷ Í gbe keeke mɔm iyi aa kpam, amma n kù fũsi woodaɛ ŋa awɔ.

⁸⁸ Jɔ̀ n wɛɛ na jiida ku jɛɛ, ku ba n maa n jirima ideɛ ŋa.

⁸⁹ Aɔ̃ Lafɛ̃ɛ, ideɛ lelei Aɔ̃i í wa, nɔ á maa wɛɛi hee do ajɔ fei.

⁹⁰ Dee dee ku jɛɛ á maa wɛɛi si tɔku do tɔku ŋa. Awɔi ì jilɛ icui ilɛ í nɛ gbugbã.

⁹¹ Mii fei í wɛɛi nnyi na ideɛ, domi aŋa fei à wɛɛi na iriɛ.

⁹² Bii woodaɛ ŋa a kù waa muum inɔ didɔ̃ wo, bii í wa ǹ ku si wahalam.

⁹³ N kaa n gbɛjɛ woodaɛ ŋa, domi do saabu nŋai aa jɔ̀ n maa n wɛɛ.

⁹⁴ Titɛɛi ǹ jɛ, faabam domi ǹ wa n dɛdɛ woodaɛ ŋa ku mà.

⁹⁵ Ilu inɔ kukã ŋa à waa kɛɛmam a ba a kpam. Si ideɛ ŋai laakaim fei í ya wa.

⁹⁶ Ǹ yɛ iyi mii fei í nɛ kɔɔ. Amma woodaɛ ŋa a kù nɛ kɔɔ.

⁹⁷ Ǹ nɛ kubii woodaɛ ŋa ntɔ ntɔ. Ǹ ya n maa n lasabu sii ajɔ fei.

⁹⁸ Woodaɛ ŋa à ya jɔ̀ n nɛ laakaii n re mbɛɛm ŋa. Ǹ ya n maa n mu ŋai waati kãma fei.

⁹⁹ Kumà iyi ǹ nɛ í re ti woo kɔm ŋa fei, domi ideɛ ŋai ǹ ya n maa n lasabu si.

¹⁰⁰ Laakaim í re ti mɔkɔ ngbo ŋa, domi ǹ wa n jirima woodaɛ ŋa.

¹⁰¹ Ǹ kɔ̀ ku too kpãa laalɔ, ku ba n jirima ideɛ.

¹⁰² N ci ya n jĩò woodaɛ ŋa domi awɔi ì kɔm si wooda ŋau.

¹⁰³ Ideɛ ŋa à dɔ̃i si gɛlɛm. À dɔ̃ à re baa nyikɔ̃.

¹⁰⁴ Woodaɛ ŋai à ya jɔ̀ n ce kiiti jiida, nɔ bɛɛbɛ mɔi ǹ ya n cé kuce ŋa iyi à jɛ ibo.

¹⁰⁵ Ideɛi í jɛ fitilai isɛm ŋa. Nɔ nŋui í jɛ inya kumái kpãam.

¹⁰⁶ Ǹ fɔ do kugbasi ǹ ni, an jirima wooda dee deeɛ ŋau.

¹⁰⁷ Ǹ wa si ijuukpã ntɔ ntɔ, nɔ ǹ ni, Aɔ̃ Lafɛ̃ɛ, jɔ̀ n wɛɛ si bɛi ì ce kuwãɛu.

¹⁰⁸ Aɔ̃ Lafɛ̃ɛ, gba kutɔɔm bɛi amua iyi ǹ wa n ceɛ, nɔ i kɔm si woodaɛ ŋa.

¹⁰⁹ Kuwɛɛm í ya maa wai si mbiisi ajɔ fei, amma n kù gbɛjɛ woodaɛ ŋa.

¹¹⁰ Ilu inɔ kukã ŋa à leem cɛkũm, amma do nŋu fei, n kù fũsi woodaɛ ŋa awɔ.

¹¹¹ Ideɛ ŋai à jɛ tubu jiidam do ajɔ fei, domi aŋai à ya jɔ̀ n maa n nɛ inɔ didɔ̃.

¹¹² Ǹ jɛsi n ceò ideɛ icɛ. Nŋui í jɛ ribam hee do ajɔ fei.

¹¹³ Ǹ cé inɛ ŋa iyi à nɛ idɔ minji, amma ǹ nɛ kubii woodaɛ ŋa.

¹¹⁴ Awɔi ì jɛ bi ku manjim do bɛi tɛlim. Kpãa ku cɔm í wa si ideɛ.

¹¹⁵ Iŋɛ woo ce laalɔ ŋa, i jĩim ŋa nɔ n jirima wooda ŋa iyi à jɛ ti Ilaaɔ̃ Lafɛ̃ɛm.

¹¹⁶ Mum ku ba n maa n wɛɛ si bɛi ì ce kuwãɛu. Maà jɔ̀ anyɔ ku mum si kpãa ku cɔm.

¹¹⁷ Jɔ̀ i jɛ sobim, ku ba n ba faaba, nɔ ijum ku maa wa si kukɔɛ ŋa.

¹¹⁸ Inɛ ŋa iyi à yaa à jĩò woodaɛ ŋau fei, ì ya lele ŋai domi lasabu nŋa fei iboi.

¹¹⁹ Inɛ laalɔi ilɛ ŋau ì ya nyɔ ŋai si iri ankitã. Na ŋɔi í jɔ̀ ǹ bi ideɛ ŋa.

¹²⁰ Aram fei wa yayai na njoɛ iyi ǹ wa n ce, nɔ njo wa mum na kiitiɛ.

¹²¹ Ǹ ce iyi í jɛ dee dee do iyi í tɛ. Maà jɔ̀ n dasi awɔi inɛ ŋa iyi à waa taam gbugbã.

¹²² Na araɛ na amu woo ce icɛɛ ku ba n mà iyi aa ceem didɔ̃. Maà jɔ̀ ilu faau ŋa a taam gbugbã a tɛɛsɛm.

¹²³ Ijum ŋa à gbɛɛji do faabaɛu ku degbe, faaba iyi ì ce kuwãɛu.

¹²⁴ Cea amu woo ce icɛɛ yaase bɛi jiida ku jɛɛ í to. Kɔm si woodaɛ ŋa.

¹²⁵ Amu woo ce icɛɛi, muum bisi ku ba n mà ideɛ ŋa.

¹²⁶ Aɔ̃ Lafɛ̃ɛ, awaati í to iyi ì nɛ i ce ngɔgɔ. À waa kua woodaɛ ŋa.

¹²⁷ Na ŋɔi í jɔ̀ ǹ bi woodaɛ ŋa í re wura. Ǹ bi ŋa í re baa wura alala.

¹²⁸ Ŋɔi í jɔ̀ ǹ wa n doo ŋa si mii ŋa iyi à jɛ dee dee, nɔ ǹ cé mii iyi í jɛ ibo fei.

¹²⁹ Ideɛ ŋau à jɛ jiida. Ŋɔi í jɔ̀ ǹ wa n jirima ŋa.

¹³⁰ Yaasei ideɛ ŋa ku mà í ya jɔ̀ inɛ ku wa si inya kumái, nɔ í ya jɔ̀ inɛ ŋa iyi a kù nɛ kumà ŋa a ba kumà.

¹³¹ Ǹ wa n dɛdɛ ideɛ ŋaui ntɔ ntɔ, domi ǹ nɛ kubii woodaɛ ŋaui ntɔ ntɔ.

¹³² Sinda wa ikpa bi tom, nɔ i ceem didɔ̃ si yaase bɛi ì ya cea inɛ ŋa iyi à biɛ.

¹³³ Jɔ̀ n ba gbugbã si bɛi ì fɔ, nɔ i maà jɔ̀ mii laalɔ kãma ku maa nɛɛm.

¹³⁴ Nyam hai si awɔi woo taa inɛ ŋa gbugbã ŋa ku ba n yɔkɔ n jirima woodaɛ ŋa.

¹³⁵ Amu woo ce icɛɛi, gbam do inɔ akã, nɔ i kɔm si ideɛ ŋa.

¹³⁶ Cikãajum ŋa à waa cã bɛi inyii ido, si na iyi í jɔ̀ a kù waa jirima woodaɛ ŋa.

¹³⁷ Aɔ̃ Lafɛ̃ɛ, awɔi ì jɛ dee dee. Kiitiɛ ŋai à jɛ ntɔ.

¹³⁸ Ì jilɛ woodaɛ ŋai do dee dee ku jɛ, nɔ i ci ya kpaasi.

¹³⁹ Idɔm í kɔ̃ iyi ǹ yɛ mbɛɛm ŋa à gbɛjɛ ide iyi ì fɔ.

¹⁴⁰ Ideɛ í to a dasiɛ naanɛ mam mam, nɔ amu woo ce icɛɛ ǹ nɛ kubiɛ.

¹⁴¹ Ǹ jɛ kusu nɔ inɛ ŋa à dondam, amma n kù gbɛjɛ woodaɛ ŋa.

¹⁴² Dee dee ku jɛɛ, á maa wɛɛi hee do ajɔ fei, nɔ woodaɛ ŋai à jɛ ntɔ.

¹⁴³ Inɔ kufɔ do zigiida à naa sim ntɔ ntɔ, amma woodaɛ ŋai à jɔ̀ ǹ nɛ inɔ didɔ̃.

¹⁴⁴ Woodaɛ ŋai à jɛ ntɔ nɔ aa maa wɛɛi hee do ajɔ fei. Muum bisi iyi an mà ŋaò nɔ n wɛɛ.

¹⁴⁵ Aɔ̃ Lafɛ̃ɛ, ǹ wa n kpeɛi do idɔm fei. Jɛɛm nɔ n jirima woodaɛ ŋa.

¹⁴⁶ Ǹ wa n tɔɔɛi, faabam nɔ n jirima woodaɛ ŋa.

¹⁴⁷ Hai amɛɛjuumái ǹ ya n tɔɔɛ sobi nɔ n maa n degbe ide iyi aa fɔ.

¹⁴⁸ Hee iju ku maa má, ǹ ya n dedei n maa n lasabu si ideɛ.

¹⁴⁹ Aɔ̃ Lafɛ̃ɛ, gbɔ imum si jiida ku jɛɛ. Si kiitiɛ jɔ̀ n wɛɛ.

¹⁵⁰ Inɛ ŋa iyi à waa bi a ceem laalɔ à maai sim wa. Inɛ ŋau à jĩò woodaɛ ŋa.

¹⁵¹ Aɔ̃ Lafɛ̃ɛ, ì wa kɔkɔm nɔ woodaɛ ŋa fei ntɔi.

¹⁵² Woodaɛ ŋau ǹ mà iyi awɔi ì jilɛ ŋa hai ku kpɛ, nɔ ì jilɛ ŋai a maa wɛɛ hee do ajɔ fei.

¹⁵³ Cɔ wahalam, nɔ i faabam, domi n kù gbɛjɛ woodaɛ ŋa.

¹⁵⁴ Kɔ̀ɔm nɔ i yám. Jɔ̀ n wɛɛ si bɛi ì ce kuwãɛ.

¹⁵⁵ Faaba í jĩò ilu inɔ kukã ŋa domi a kù waa dɛdɛ a ceò ideɛ ŋa icɛ.

¹⁵⁶ Aɔ̃ Lafɛ̃ɛ, araareɛ í la. Jɔ̀ n wɛɛ si bɛi ì bi si kiitiɛ.

¹⁵⁷ Woo kpãm iju do mbɛɛm ŋa à kpɔ, amma n kù yaa hai si ideɛ ŋa.

¹⁵⁸ Ǹ cé inɛ ŋa iyi à kɔ̀siɛ ŋa, aŋa iyi a kù waa jirima ideɛ ŋa.

¹⁵⁹ Aɔ̃ Lafɛ̃ɛ, jɔ̀ i mà iyi n nɛ kubii woodaɛ ŋa. Jɔ̀ n wɛɛ na jiida ku jɛɛ.

¹⁶⁰ Si fei ideɛi í jɛ ntɔ. Nɔ woodaɛ ŋa aa maa wɛɛi si dee dee ku jɛ hee do ajɔ fei.

¹⁶¹ Amanlu ŋa à waa kpãm iju si ngbɛ, amma ideɛ nŋu akãi wa da zigim.

¹⁶² Ideɛ í ya jɔ̀ n maa n nɛ inɔ didɔ̃i bɛi inɛ iyi í ba amani nla nla.

¹⁶³ Ǹ cé ibo nɔ ǹ wa n cɔɔi bɛi mii laalɔ. Amma ǹ nɛ kubii woodaɛ ŋa.

¹⁶⁴ Ajɔ akã, tuuba meejei ǹ ya n saabuɛ, na irii kiitiɛ ŋa iyi à jɛ dee dee.

¹⁶⁵ Laakai ku sũ nla nlai í ya jɛ ti inɛ ŋa iyi à bi woodaɛ ŋa. Nkãma ci ya jɔ̀ a koosɛ.

¹⁶⁶ Aɔ̃ Lafɛ̃ɛ, ǹ wa n cɔ kpãai i faabam, na ŋɔi í jɔ̀ ǹ wa n jirima woodaɛ ŋa.

¹⁶⁷ Ǹ wa n jirima ideɛ ŋa. Ǹ nɛ kubi nŋai jiida jiida.

¹⁶⁸ Ntɔ ntɔ ǹ wa n jirima ideɛ do woodaɛ ŋa. Mii iyi ǹ wa n ce fei ì waa yɔɔ.

¹⁶⁹ Aɔ̃ Lafɛ̃ɛ, jɔ̀ i gbɔ anu ku dɔ̃m. Muum bisi bɛi ì ce kuwãɛu.

¹⁷⁰ Jɔ̀ i gbɔ kutɔɔm. Faabam si bɛi ì fɔu.

¹⁷¹ Ǹ bi saabu ku ya maa fita hai si gɛlɛm, domi ì kɔm si woodaɛ ŋa.

¹⁷² Ǹ bi n ya n maa n kɔ̃ iri do ideɛ ŋa, domi woodaɛ ŋau fei à jɛ dee dee.

¹⁷³ Woodaɛ ŋai ǹ cica n jirima. Naa i sobim.

¹⁷⁴ Aɔ̃ Lafɛ̃ɛ, ǹ wa n cɔ kpãai faabaɛi ntɔ ntɔ. Woodaɛ ŋai à ya jɔ̀ n nɛ inɔ didɔ̃.

¹⁷⁵ Jɔ̀ n wɛɛ ku ba n maa n cĩɛ. Nɔ kiitiɛ ŋa a jɛ sobim.

¹⁷⁶ Ǹ wa n dabii bɛi angudã iyi í nyɔ. Naa i dɛdɛm amu woo ce icɛɛ, domi n kù gbɛjɛ woodaɛ ŋa.